【再創世紀】潘志文親自解釋中風演法:每一次爆血管都唔同

撰文:
最後更新日期:

早前提過,潘志文4年內在4部劇集「中風」4次,成為無綫的「御用中風演員」,今次終於請到潘志文親自分享「中風」體驗。

【再創世紀】潘志文又「中風」 除咗「歪嘴」仲有新演法!

《再創世紀》中潘志文的戲份未算太重,而大部分演出非醫院則在家養病,但在一眾好戲後輩例如郭晉安、楊怡、林文龍等領演之下,他仍被網民大讚是全劇演技最好的一位,更有個別網友將茅頭直指袁偉豪,說潘志文把他完全比下去。

每次「中風」都有獨立設計

「每一次嘅中法同爆血管法都唔同!」這是潘志文親口承認的,「其實最緊要都係睇個監制同導演,佢要我中風中到咩程度,有一啲佢要講嘢口齒不伶俐,有一啲佢要我流口水,有一啲又叫我做到唔好咁難睇,要好樣啲,之前《幕後玩家》又演過要瀨尿失控添!」而潘志文今次在《再創世紀》所飾演的卓啟堂,心臟病發後雖然未能說話,亦未見潘志文前作般的歪嘴,明顯是歸類為「不太難看的一類」,潘志文謂今次「中風」中得最歡喜:「去觀摩多啲,問多啲人,問吓啲朋友你老豆中風嗰時係點架?但你知啦,啲觀眾可能食緊飯,睇見你歪口歪面都有少少噁心,例如我阿爺都中過風,我見佢嗰個樣,但如果拎佢個樣出嚟做戲畀人睇,有時人哋都唔想睇得咁核突。」

潘志文的「面癱式」演法,不用對白,靠面部表情就足夠交代劇情

+3
+2

植物人都要「演」

提到長駐醫院景,令潘志文又想起約40年前自己亦曾試過類似經歷,潘志文當年是麗的電視的一線小生,在1979年同時參與拍攝劇集《新變色龍》以及《俠盜風流》,結果因為分身不暇令潘志文被安排在《新變色龍》中槍後住院昏迷演植物人,而且一躺就係13集了。回想拍攝的時候,潘志文說:「當時我一星期有6日半都拍《俠盜風流》,淨低半日就拍《新變色龍》瞓醫院。當時真係好攰,瞓著咗覺,我真係扯鼻鼾,但個導演話唔得,第一,啲鼻鼾影響收音,同埋植物人係唔應該有咁大鼻鼾嘅!」所以說,潘志文是一位連演植物人都不會鬆懈的好演員!

潘志文最「契弟」

提到《新變色龍》,又令記者聯想到潘志文在《變色龍》的一句經典對白:「我都有句座右銘,就係我唔怕啲契弟,因為我最契弟!」潘志文最近亦留意到成為網民金句!不過對於經典對白流傳至今,潘志文不敢邀功:「高志森當年都有份為「變色龍」編劇,我問佢係呢句嘢係邊個度出嚟,佢話係蕭若元、麥當雄去度出嚟,我唔怕啲契弟,因為我最契弟吖嘛!」



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。