【全民造星.專訪】旁白文卓森想繼續獻聲:有人叫我平價少爺占

撰文:
最後更新日期:

ViuTV選秀真人騷《全民造星》將於明天(14日)舉行總決賽,屆時最後10強會在九龍灣展貿中心一較高下,雖然一直以來觀眾都傾向將焦點放在姜濤、Ian、肥仔等大熱門,又或者晨早已被淘汰但極具潛質的Anson Lo身上,但這個節目都有一些男生值得留意及支持,當中包括為節目獻聲做旁白的「旁白君」文卓森。

文卓森並不是一個專業的旁白、配音員,他本身是《全民造星》的撰稿員,但節目經過他的聲音潤飾後,絕對是生色不少,其抵死、搞笑的旁白風格,令觀眾對節目的印象更為深刻。其實文卓森曾經在DBC數碼電台做過DJ,大學時期已經在電台做Operator及新聞報道員,到大學三年級時,他膽粗粗地將節目Demo交給台長,而台長亦非常大膽地安排他逢星期一至五下午3點至5時主持節目,與鄭裕玲主持的商台節目《口水多過浪花》對撼:「其實當時我仲喺城大讀緊書,好彩有幾個阿Sir都係喺電台度做,好明白我個情況,就算走位都唔怪我,有時仲會車我返工。」

為《全民造星》擔任旁白的文卓森曾在DBC數碼電台做過DJ,電台停播不久便加入ViuTV做撰稿,先後參與過《歌度有》系列、《胖伴》等節目製作。(葉志明攝)

曾在電台做DJ

DBC數碼電台在2016年停播後,文卓森做過PR、做過Marketing,最後因為見到ViuTV請人,便加入電視台做撰稿員並成為了監製花姐下屬,參與了《歌度有》系列、《胖伴》等節目製作後,今年便着手搞《全民造星》的工作:「喺DBC做咗4年都想試其他嘢,我試過做PR、Marketing,雖然都係涉及創意,但係同能夠娛樂到人個感覺係好唔同。」

提到做電視台撰稿與做電台DJ的工作性質亦大為不同,文卓森坦言一早諗通:「其實喺電台做咗4、5年都好夠皮,始終做電台做4、5年都係Fresh Grad價,求其搵份工都可能高人工過做電台,所以而家做嘢都係求開心多。(但都辛苦?)好似細個轉學校咁,要適應,但係好快就適應到,呢度唔似電台,準備好晒先埋牙,出外景好多時有突發嘢,幾得意、好有挑戰性,但解決到係好有成功感。」

雖然與電台工作有分別,但文卓森認為電視台的工作亦非常好玩。(葉志明攝)

再次獻聲

至於講到文卓森最後為何能夠擔任《全民造星》的旁白,感謝監製及創意總監賞識的他坦言除了自己有「電台底」外,客觀因素都幫助他不少:「因為呢個節目比較趕,我哋係一路拍一路做後期,基本上我係一星期返足七日,咁冇理由叫個VO Talent返足七日等開工嘛!由於本身我都係寫旁白,我錄埋個效率就最高,咁當初都要試嘅,而《全民造星前傳》就係我嘅考驗,我錄完花姐就覺得OK,叫我繼續錄埋之後嘅集數。我聽到好開心,有種莫名興奮,把聲可以再次畀大家聽到。(花姐平時點?)佢的確係有種令人望而生畏嘅感覺,但佢唔係不近人情,仲識講笑添!佢亦都係一個善解人意,好溫柔嘅女士,同埋從來都係對事不對人,唔會鬧人。」

雖然上司花姐霸氣十足,但文卓森認為對象是一位善解人意,好溫柔的女士。(葉志明攝)

寫稿時感動流淚

談到文卓森在《全民造星》的前期,與在後期的旁白風格甚為不同,他坦言這個是一早安排:「點解一開始99強、55強會咁Mean,係因為一開始一班仔仔都係好Raw,預咗好多人會鬧,所以我哋希望觀眾鬧我哋,而唔係鬧班參賽者。如果我哋鬧咗佢哋先,觀眾笑完喇,就唔會話參賽者唔好,因為我哋都鬧咗,觀眾都無謂再鬧。」而去到之後團體戰,「旁白君」的角色都會抽離一點,因為節目組想觀眾眼光聚焦於參賽者的成長、熱血和淚水,「同埋已經冇位再去Mean佢哋。」他亦因參賽者的逐漸成長,感動得在寫稿時喊了幾次。

文卓森直認寫稿時被參賽者的熱血感動,喊了幾次。(葉志明攝)

+3
+2

第100位《造星》仔仔

成長的,其實不止是99名參賽者,亦包括這位「第100個《造星》仔仔」文卓森:「其實我好多位都可以做得更好,但如果要做到最理想嘅效果,可能要用多三倍時間,不過比起一開始錄VO,而家係上手咗好多,一開始我係用咗好多個鐘去搞,但係如果你要我講我整體有咩成長,我又唔係好講得出。」文卓森坦言《全民造星》後亦想繼續擔任旁白:「畀多啲Job我吖!其實我真係好鍾意做有關聲音嘅工作,我之前做電台拍檔係泰山,佢好鬼多電影預告片搵佢錄VO,好正!唔係講緊收入喎,係佢好鍾意《星球大戰》,所有《星球大戰》嘅戲都係搵佢錄返VO,我自己就好鍾意超級英雄電影,好希望可以有一日錄到佢哋。」

平價少爺占

「有人話我把聲似少爺占,我都好想好似佢咁做玩到聲嘅VO,之前我幫手去錄一個廣告,係一條好正經嘅謂規則嘅短片嚟,錄完之後Sound Engineer留低我,話叫我錄多兩個Demo,留低把聲畀人揀下,話我似少爺占,可以做平價少爺占,佢推咗嘅Job可以畀你,錄完之後,佢叫我錄多個扮林海峰,話我可以做少年林海峰,佢唔做嘅嘢我可以做埋。(真係接到工作?)事實係冇成功過,畀咗兩個朵我,但係都唔揀我,啲工作都係畀咗商台DJ,我永遠都唔係首選,我覺得當時我係輸名氣,咁其實電視、電台嘅廣告,係搵一把熟悉嘅聲音,未必係搵一把好聽嘅聲。」其實他已經預備好上自己的舞台,你又預備好看他的表演未?

想睇文卓森點樣玩自己把聲?請點擊以下片段:



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。