【早霸王】男聽眾求忽然被分手真相 森美：真係唔使恨
撰文：鄺鈺瑩
出版：更新：
男主角軍迪話被分手後，因為對方完全斷聯，所以想透過《早霸王》搵出分手相真。
又到星期五嘅《早霸王》「你知道唔知道有人掛住你」，今次主角係做運輸業嘅軍迪，佢話啱啱被分手一個月。「佢話同我一齊好無安全感，所以分手，無安全感係因為我工作唔夠穩定，好似無為未來打算。」軍迪似乎唔多想信呢個分手理由，所以致電《早霸王》求一個真相。
對於森美來說，收入唔穩定同個樣唔穩定，都可以係一個分手理由。
軍迪指自己雖然做運輸，但向來有固定的客戶，加上每月收入都有一半剩餘，「我係屬於今日搵幾多使幾多，但同佢一齊之後都有諗過再搵多啲錢，所以完全唔能夠理解佢嘅說法。」森美聽完之後，都認為軍迪收入未必真係好多，但至少叫做有份穩定嘅收入，「會唔會係因為佢覺得你搵得唔夠，令佢生活唔穩定呢？男仔會唔會同女仔講你個樣唔穩定，我哋不如分手，點解要將所有嘢都嫁禍去男仔身上？搞到個個男仔心態就係『我要搵好多錢』，變相愛已經唔最重要，真係唔使恨架。」
森美今日發表咗好多愛情觀。
軍迪話同前度拍拖無耐，已經有同對方結婚打算，但未知是否因而造成了壓力。「佢有話過結婚只係一張紙，無乜義意。」聽到呢句，森美又有嘢發表：「如果你覺得無義意咪簽左佢囉，最介意先會最唔肯簽。」聽落又真係好似有少少道理喎。聽到軍迪都幾有決心「求真相」，森美係幫佢打電話前，先做少少心理建築「佢唔鍾意，總有萬七個原因。」指當一段愛情變淡時，人總會說出各式各樣的藉口。電話好快接通，而對方亦表示大概估到係咩原因，所以成為《早霸王》主角，就係森美準備接通軍迪時，呢位前度就細細聲講咗一句「都係唔好」。可惜，雙重電話已接通，未知係因為接收唔好，定係唔夠膽，軍迪一直都唔係好出聲，最後當佢「喂」嘅同時，前度就話「我要做嘢」收咗線，軍迪怕且永遠都唔會得到真相。