【年初二】家燕姐利市特別好意頭 湯洛雯要帶男友登門拜訪?

撰文:
最後更新日期:

今日是大年初二,相信各位還是在前往拜年的路上,想𢭃大利是?但又怕應對長輩問題?想知見家長有咩要留意?以下一文總結所有貼士,由薛家燕和湯洛雯解答你所有疑難。

新年如何從家燕姐手上得到大利市?
家燕姐:「我封利市啲人話好好意頭。」
湯洛雯:「我要啊!我要!」
家燕姐:「咁一定啦。當然啦,我會返公司嘅,我又會出嚟同大家團拜嘅,喺嗰段時間就可以𢭃我利市啦。我又冇理由攞住疊利市周街派加嘛,香港幾百萬人喎!」
湯洛雯:「郭富城應承咗。」
家燕姐:「咁郭富城做啦,我遇到啲熟人咪派囉。」
湯洛雯:「家燕姐啲利市封好得意㗎,係印咗佢自己個樣,同埋佢著住財神衫。」
家燕姐:「旺財吖嘛。」
湯洛雯:「所以聽講好多人都特登問你拎利市。」
家燕姐:「好似俾個信心佢哋咁,佢哋袋咗成年都話行好運喎,咁第二年又同我攞過啦,攞完之後話我媽又想攞封,跟住話我爸又想攞封,跟住就越攞越多。」
湯洛雯:「佢哋淨係攞利市封定要埋啲餡?」
家燕姐:「一定係有餡既!我俾利市封你冇餡得唔得吖?」
湯洛雯:「梗係唔得啦,我嗰封要超大㗎、厚嘅!」

家燕姐表示新年要講些吉利說話,年輕人之間流行說的「不勞而獲」、「財色兼收」等願望自己放在心裡就好了。(陳順禎攝)

新年見到長輩都會被問一連串問題,靚湯原來都怕俾人問?
湯洛雯:「我諗我今年拜年應該會好多人問我:幾時⋯⋯」
家燕姐:「紅鸞星動咁囉。」
湯洛雯:「拜年就會見到好多親戚,親戚應該都會好關心我嗰方面,所以大家親戚唔好問我喇,做近嘢㗎喇。」
家燕姐:「通常啲人問都會問:幾時到你派利市啊?」
湯洛雯:「係啊!」

湯洛雯表示很多人都很關心她的感情狀況,但自己暫時挺享受單身。(陳順禎攝)

如果湯洛雯帶男朋友予家燕姐過目有咩要注意?
家燕姐:「首先睇吓佢識唔識禮貌,譬如嚟探我,梗係要帶手信、禮物啦,就唔好就咁買包橙喎,起碼一個大嘅(Gift)Hamper。如果新年就帶封利市啦,雖然佢係後輩,即都俾封利市我、好意頭咁樣啦。」
湯洛雯:「吓,後輩俾返利市前輩?」
家燕姐:「可以㗎,仲可以大封啲添㗎。同埋儀容要清潔、乾淨,雖然年三十晚可能打通宵麻雀,或者玩天光,但嚟到見到我就一定要剃鬚、梳靚個頭。最緊要就係對你好,即佢同你嚟見我嘅時候,招呼你周到、錫你最重要,譬如嗰日凍嘅,同你拎住件衫啊之類。」
湯洛雯:「好Sweet啊,講完好似我就真系要帶個人返嚟俾你見。」
家燕姐:「直情係㗎喇,咁我又會準備封利市俾你哋嘅。」
湯洛雯:「我而家記低先,冇諗過原來有咁多注意事項。我就知道要嗌人、打招呼、有眼神交流、笑容滿面、帶手信,呢幾樣係最緊要。」
家燕姐:「問埋我幾時得閒,請我食餐飯。」

家燕姐說新年會和家人去新界行個大運,但許願樹等地太多人則不會考慮。(葉志明攝)

新年注意事項
-吃蘿蔔糕、年糕,喻意步步高陞
-吃生菜,喻意生生猛猛
-初一要吃素;初二才吃開年飯
-新年前剪頭髮、買鞋,新正頭(初一至十五)不可以做
-初一不可以掃地、洗頭,按照傳統歷法是晚上11時前
*想知道更多新年內容可留意無綫電視節目《新春開運王》

+12
+11
+10

 

【周五心意運動】您捐一封$50利是,已可為基層送上溫飽,01心意呼籲您支持【新福事工協會】 ,每$50就有1個基層家庭獲3日短期食物援助https://heart.hk01.com/zh/project/10014



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。