【反黑】續集製作成本逾兩億 洪興龍頭蔣生正式加盟?

撰文:鄺鈺瑩
出版:更新:
「B1-1組」辦公室由小欖搬返入九龍區,從此返工省時又唔快塞車。

預計年中開拍嘅網劇《反黑2》,劇本已完成,而演員陣容亦已大致確定,導演宋本中為節省車程時間,更租下其工作室旁嘅單位,準備將其改裝成「B1-1組」嘅辦公室。「第一季個廠季係喺小欖海水化淡廠,每日車程來回都要兩、三小時,依家租埋旁邊個單位應該會方便好多。」為咗唔使白白繳交六位數字嘅租金,所以宋本中都話要盡快開工。

萬梓良版本嘅蔣生喺《97古惑仔:戰無不勝》出現過,於劇中經常雪茄不離手。

規模、成本倍增

《反黑》第一季全30集,製作費約6,500萬;《反黑2》預計60集,拍攝時間達一年多,宋本中雖然不願透露今次製作成本,但如按規模倍增去推斷的話,隨時斥資逾二億。至於內容方面,《反黑2》的背景年份將為96年嘅香港,越南船民騷亂、赤柱監獄閘口被人以泥頭車蓄意撞壞等情節亦將會於劇中發生。「點解會搞咁耐先開拍係因為用咗好多時間喺資料搜集方面,因為網上資訊未必百分百正確,變相要搵相關人士求證。」

任達華飾演嘅蔣天生喺《古惑仔之人在江湖》出現過。

選角絕對沒有限制

演員方面,除有第一季嘅核心成員陳小春、陳嘉桓、陳國坤、吳岱融等人之外,宋本中透露預計將會加入劉浩龍、伍詠薇以及《古惑仔》系列中嘅蔣生!過往曾扮演洪興龍頭「蔣生」一角嘅,分別有任達華嘅蔣天生,以及萬梓良嘅蔣天養,兩個都霸氣十足,之不過,到底邊個蔣生會出現喺《反黑2》呢?宋本中就大賣關子,表示要遲啲先揭曉,不過其實無論邊個蔣生都好,觀眾都係最大得益者,值得一提的是,宋本中指唔少網民都都認為因要顧及內地市場,故在選角方面受到限制,但他強調《反黑》是香港製作。「就算係賣比內地又或者Netflix都好,都係引進片,所以唔會話因審批而影響選角,當然,賣咗比人,對方要刪除某啲片段我係控制唔到。」另外,提到《反黑2》遲遲未開工 ,唔少網民等到勁都長埋,宋本中就拍心口咁話:「為怕觀眾等得太耐,所以《反黑3》嘅劇本已經進行中,希望第二季播完之後,第三季馬上就可以播。」

伍詠薇喺2016年拍嘅《江湖悲劇》,都算係有少少古惑仔成份。
+2