【鐵探】姜皓文演卧底獲激讚 Bingo角色高難度:都幾精神分裂

撰文:
最後更新日期:

由惠英紅、姜皓文和袁偉豪主演的TVB重頭戲《鐵探》播出後,大獲好評,更再次引發觀眾追劇熱潮。日前劇集播出的尾段,患有腦退化症的嫻姐(盧宛茵飾)被Madam Man(惠英紅飾)安排到監獄探望兒子Bingo(姜皓文飾),二人母子情讓觀眾痛入心扉,相當催淚!

首拍TVB劇集的黑仔向來以實力見稱,今次飾演警隊臥底之餘更有不少感情和內心戲,難怪黑仔接受《香港01》訪問亦稱角色難度大:「今次角色亦正亦邪,都幾精神分裂!一個警察出咗嚟冇幾耐就俾人捉咗去做卧底,都係一個幾悲慘嘅角色。(有冇難度?)有,但呢個難度係好享受,因為我覺得Bingo呢個角色係入面豐富過晒佢哋所有嘅角色,點解咁講呢,因為Bingo可以做晒佢哋一個角色嘅元素嘅嘢,又係古惑仔又有正義感……真係幾鍾意Bingo呢個角色,係難但好享受。」

呢幕戲叫人痛入心扉!(劇照)

點撃下圖重溫精彩畫面!

對於自己在劇中與盧宛茵相認一幕,感動萬千觀眾,他稱:「同Madam Lo真係過足戲癮,因為Madam Lo真係畀到一種好慈祥媽咪嘅感覺我,因為佢有腦退化症,但成日唔記得個仔,所以做佢個仔都幾酸。而呢個仔都每一次都好想媽媽記得佢,因為佢都好鍚有腦退化症嘅阿媽,嗰個感覺真係好酸,Madam Lo係畀到呢個推動力我,埸戲做得咁好,全靠Madam Lo接到個波接得咁靚,彈返轉頭又咁豐富,同佢做呢場母子戲真係好正!呢場戲都好難忘,而最後Madam Man想滅咗我,最後忍唔住想反佢嗰場戲都好深刻!」

+4
+3
+2

他又透露與紅姐有不少感情戲:「我哋係上司同下屬嘅感情,上司同下屬都有好深厚嘅感情,等於師傅同徒弟咁,但呢個Madam Man就為咗想要得到自己嘅嘢,真係連自己嘅卧底都……真係幾過份,可以跣佢一穫金甚至滅咗佢,呢一種嘅感情都係第一次做,都幾過癮!」據知Bingo雖然中途變節,但一直沒有忘記自己作為警察的初心,但由於他掌握了Madam Man不少失職證據,最後不幸死在Madam Man手上,所以到Bingo死的一天,也沒有穿過警隊制服。

紅姐呢個角色真係好心狼手辣!

+8
+7
+6

對於不少網民稱黑仔塑造的Bingo比《潛行狙擊》謝天華演的Laughing一角更深刻、更立體,他就謙虛表示:「其實每一個演員嘅角色都有佢哋唔同嘅演法,亦有唔同觀眾嘅喜好同口味,所以又唔可以話超唔超越人哋嘅。兩個角色成份好相似,但係都各有千秋,帶畀觀眾唔同嘅感受,Bingo還Bingo,Laughing還Laughing,兩樣嘢嚟,但兩個卧底角色都咁正,我兩個都咁鍾意。」至於會否再接拍TVB劇:「有呢個可能,都係睇劇本,我唔會放過每一個精彩每一個精彩的演出機會,所以呢個機會絕對有。(有沒有信心問鼎視帝?)到時先諗啦,係有咁嘅想法,哈哈。」

黑仔演技超晒班!

Laughing都係經典角色!(圖片來源:視覺中國)



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。