張敬軒大馬個唱前突然失聲勁徬徨:歌手冇咗把聲要開騷點算呢?

撰文:
最後更新日期:

日前,張敬軒去到馬來西亞雲頂,可容納六千人嘅雲頂雲星劇場舉行《HINSIDEOUT演唱會》,全場爆滿。為咗照顧馬來西亞嘅歌迷,軒仔除咗特別安排一套新歌衫,喺歌單上歌曲亦稍作調整,加插咗香港站都冇嘅國語歌,好似《過雲雨》、《想你想得好孤寂》等作品,十分貼心。

演唱會上,軒仔換上多套靚衫,又唱又跳十分賣力,台下歌迷亦都好熱情,幾乎由開場嗌到完場。期間有歌迷向住軒仔大叫:「你好靚仔呀!」軒仔笑住話:「多謝你哋日行一善。」全場爆笑。另外,佢又透露已經錄緊全新國語碟,歌曲一半原創、一半翻唱,歌迷表示期待。

軒仔係演唱會上換上多套靚衫。

兩小時嘅演唱會中,軒仔施展混身解數表演,不過原來佢抵埗馬來西亞就病咗,佢喺台上話:「呢件事我覺得實在太奇妙!所以想同大家分享。我落機時突然間覺得喉嚨痛痛哋,第二朝瞓醒就冇咗把聲,喺酒店房好徬徨,因為作為一個歌手冇咗把聲,而第二晚就要開show,冇聲點算呢?」佢話主辦單位好貼心,擺咗暖水等各種「醫療設備」喺佢房,「我都不斷祈禱,今晚開得番聲唱歌。當然好大部份力量係嚟自你哋(觀眾),謝謝大家!」

巡迴演唱會都絕非搬字過紙,軒仔特意為大馬歌迷準備新衫新歌單,相當有誠意。

第一次encore後,軒仔上台唱出《斷點》、《Hurt So Bad》、《只是太愛你》及《餘震》等經典歌曲,唱完《My Way》後,演唱會結束,不過場館雖然爆燈,但一眾歌迷依然唔肯走繼續大叫encore,於是軒仔再次出場,唱出《愛情無關是非》及《煙雨斜陽》,兩次encore後演唱會圓滿結束。

Encore過後場地開晒燈觀眾都唔願走,軒仔應歌迷要求再次出場獻唱。



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。