【倚天屠龍記.專訪】52歲周海媚重提刪微博事件:唔鍾意故意抹黑

撰文:
最後更新日期:
武林至尊,寶刀屠龍,號令天下,莫敢不從!倚天不出,誰與爭鋒?
《倚天屠龍記》

金庸小說《倚天屠龍記》總共8次被改編為電視劇集,最新一輯由曾舜晞、祝緒丹、陳鈓琪主演,而周海媚所飾演的,就是手握倚天劍的滅絕師太,劇集現於無綫黃金時段播放。

這是周海媚在最新版本《倚天屠龍記》中滅絕師太的造型。

早知是周海媚演周芷若,我就改結局了
金庸

在8部《倚天屠龍記》中,1994年由馬景濤飾演張無忌的版本被公認為最經典的一套,而飾演女主角周芷若的,正是周海媚,當時原著作者金庸指自己最愛的角色是由她飾演的周芷若:「早知是周海媚演周芷若,我就改結局了。」早前周海媚於橫店出席粉絲見面會,更化身25年前周芷若的經典造型。

點擊下圖欣賞當日盛況:

+2

記者:記 周海媚:周

記:再次化身周芷若感覺如何?

周:其實冇咩特別,今次去係去一個大型嘅影迷見面會,都好開心,因為大會本來預計係一萬人,但最後有三萬人去到會場,因為喺係秦皇宮,一個大型好空曠嘅廣場,嗰日大家都玩得好開心。

1994年版本《倚天屠龍記》的周海媚(飾周芷若)。(微博圖片)

記:1994年嘅周芷若令你紅遍中港台甚至海外,你同唔同意?

周:我同意。拍完94年版本《倚天屠龍記》之後,首先係喺台灣好受歡迎,亦都因為咁而同台灣嘅製作人再合作拍多兩套電視劇,然後東南亞嘅傳播率都好高,同埋當年演完呢個角色,好多人都視我為經典,所以自己都好開心。

1985年,周海媚參選無綫電視《香港小姐競選》入行。(網上圖片)

記:知道你係瓜爾佳氏嘅後裔,細個嘅時候有咩規矩要遵守?

周:其實冇咩特別,只不過係我嘅祖家其實係廣州,細個嘅時候返去廣州拜年,就會有好多小朋友一齊玩,不過啲大人就會講滿洲話,但我就聽唔明咁。如果係風俗(習俗)都冇乜特別,因為我哋屋企人都係生活喺廣州,啲祖先係縣令,即係而家嘅巿長咁。

記:可唔可以解釋吓點解當時要怒刪微博?

周:其實當時好多人都話我怒刪微博,但我唔係,我刪之前係經過考慮,我係覺得呢個平台唔係太適合我玩,我唔係好鍾意一啲故意抹黑,惡意去針對嘅言論。我比較鍾意啲溫和啲,視覺會闊啲,公平啲嘅平台去玩。其實我而家都仲係好鍾意玩「頭條號」,我都有一系列嘅「周海媚萌寵日記」其實都係好受歡迎,好多人好鍾意睇。同埋我製作嘅時候都覺得好開心,好自由哋去表達我自己。仲有抖音啦,我鍾意做咩都得,唔化妝就咁拍可以。其實仲有好多地方都可以畀藝人去發聲,表達自己。

周海媚在回答問題時表現得很雀躍。

記:周海媚係咪都係一個執著嘅人呢?

周:執著?點解要樣樣嘢都咁介懷呢?我唔可以睇得好開?我50歲就應該樣樣嘢都好介懷?咁樣做人會開心咩?點解要將自己束縛住呢?框喺一個框框裡面呢?做人要開放去睇呢個世界,張開你嘅眼睛。我發覺而家有好多好多年輕人,佢哋嘅世界就喺手機,連過馬路都要DUP低頭,咁好危險㗎嘛,然後你同佢講嘢,佢又會望住個手機嚟答你,咁好唔尊重人,點解會咁呢?點解呢個世界會變成咁呢?我鍾意係望住人對眼睛去講嘢,咁樣溝通大家先至舒服。

當年的周海媚。(網上圖片)

記:點解近年你都長駐內地工作?

周:其實我決定嚟北京發展同長住,最初我都會驚唔適應,唔習慣,但後尾住落咗先發覺自己好適應北方嘅生活,雖然我係南方出身,但我係流住北方嘅血,我係滿族人。

周海媚經常淡妝上陣拍片分享自己與愛犬的有趣互動。

記:對於美魔女/凍齡女神呢啲稱號,會唔會有壓力?

周:冇乜壓力,大家講,就係你哋講,但我又唔覺得要有啲咩壓力去保持,例如咩打針呀,我冇呢啲,順其自然就係最好。

記:所以先經常素顏拍片?

周:點解要介意呢?咁你唔會老咩?你都會老,你都有皺紋㗎啦!

其實周海媚曾經公開表示過自己不美。

記:睇返資料,除咗1988年嘅「臺灣金龍獎香港傑出電視女演員獎」之外,基本上未得過任何「演技」上嘅肯定,其實你覺得自己嘅演技如何?

周:其實我見到好多網上嘅粉絲,佢哋都好鍾意睇我嘅作品,亦經常去搜索返我嘅作品翻睇,好多時都會喺評論度講覺得我演得好好。我認為有呢啲評論就係最真實,比起一個獎項仲要好,我仲開心。

「退休?我冇諗過要退休,我未老到要退休,諗都冇諗過,到時先算啦。」



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。