【友枱VIP】大台導演藉教戲抽水 鍾麗淇被摸手仔:點解要摸我?

撰文:鄺鈺瑩
出版:更新:
鍾麗淇、梁靖琪同姚樂怡都試過被「抽水」同「被攝位」。 (電視畫面)

所謂「三個女人一個墟」,圈中有唔少女藝人都會同閨密組成姊妹團,而人稱「七魔女」嘅佘詩曼、梁靖琪、鍾麗淇、湯盈盈、文頌嫻、周家蔚同姚樂怡至今已相識超過十年,之前仲試過齊齊穿白恤衫,大騷美腿影寫真賀相識十周年。
 

梁靖琪話係內地登台,派簽名相時突然有人從後抽水。 (電視畫面)

喺最新一集ViuTV節目《友枱VIP》中,周家蔚就搵嚟文頌嫻、姚樂怡、梁靖琪及鍾麗淇做嘉賓。節目中,被問到有無試過因要搏上位而遭受過不公平待遇時,姚樂怡就話試過喺一個大台活動上被女星撞開,雖然佢堅抗透露女星身份,但文頌嫻好快就問「係未電波少女」,姚樂怡就話:「佢唔係成員之一,但同你老公好friend」,眾人之後再追問「係未已經生咗BB」時,姚樂怡就即時打眼色叫大家唔好再估,仲話私下再討論。

鍾麗淇入行第一套劇係《刑事偵緝檔案III》。(網上圖片)

除咗出陰招之外,節目中,眾人亦提到曾經遇過「抽水」,鍾麗淇指當年係第一次拍劇,其中一位導演藉教戲不停捉住自己隻手。「其實場戲係唔關隻手事,直到一個演員就話『你摸夠未呀?』嗰陣我只係覺得點解佢要摸我呢?」梁靖琪爸爸雖然係大台監製梁家樹,但原來佢都試過被「抽水」,而且仲要係好幾次!「好明顯,但我唔敢講,佢教我點做戲,有啲動作係摸到我,喺側邊(胸部)呢啲位拓住,直到有人出聲話『唔使咁嘛』先收手」

「七魔女」相識超過十年。(梁靖琪微博)