【婚姻合伙人】張嘉兒產後4個月極速修身 拍劇時好掛住個女

撰文:
最後更新日期:

TVB新劇《婚姻合伙人》最近在翡翠台熱播,除了兩位主角楊明及高海寧之外,劇中不少配角都相當搶鏡。在昨晚(14日)播出的最新一集中,飾演楊明舅姨Cat姐的張嘉兒,不滿Demo王(古明華飾)只為個人夢想不理3個仔。雖然Cat表面上處處針對Demo王,經常對他惡言相向,但實際上就好愛錫3個姨甥仔,不少網民都大讚嘉兒的演出與以往不同,將角色心軟和兇惡的一面都完美演繹,演技大有進步!

張嘉兒在新劇中飾演楊明的舅姨Cat,不少網民都大讚她今次的角色有發揮。(電視截圖)

+8
+7
+6

嘉兒在2007年參選香港小姐擊敗同屆熱門王君馨、何傲兒等,爆冷奪得冠軍,更因為包包面被外界封為「闊面港姐」,受到網民抨擊,指她是「史上最差的港姐」。雖然嘉兒入行多年來發展平平,但愛情方面就好幸福,2015年與金融才俊Nathan結婚,翌年誕下大女Leora,今個月初再誕下細女Hannah,一家四口幸福美滿。目前在坐月的嘉兒今日(15日)凌晨在IG Post了一張餵母乳的照片,透露BB近況,大女也有幫手照顧妹妹,而自己就趁着空檔重溫自己的演出:「今晚呢個時候佢哋已經瞓緊覺,我就睇《婚姻合伙人》。大家可以留意下,有我份㗎。」

嘉兒2015年與圈外男友結婚。(IG/@misskayicheung)

嘉兒在今個月7號誕下二女,今日(15日)更在IG Post了一張餵哺母乳的相片。(IG/@misskayicheung)

新劇在2017年初開拍,所以其實嘉兒在拍攝時只是剛生完不久,她在接受《香港01》訪問時也表示拍劇過程不容易:「我都有睇返呀,我覺得自己做得都OK嘅,但仲有好多好多進步空間。嗰陣囡囡得4個月,所以其實好難兼顧,因為我頭6個月都係全母乳,我最有印象就係成日要喺公司泵奶。同埋好掛住囡囡,望住個電話睇住個女,有時佢喊我就心諗好想快啲收工返屋企陪佢,所以嗰陣真係比較難。最記得有一場戲係高Ling餵奶,搞到我仲掛住個女,佢喺度餵奶嘅時候我又餵唔到畀自己囡囡,所以嗰陣拍劇都好掛住囡囡。(點解咁快拍返劇?)嗰陣時諗住自己應付到,因為已經過咗3個月,自己坐月又坐得好,覺得自己都好精神。」

嘉兒在2016年9月誕下大女,產後4個月就投入拍攝《婚姻合伙人》。(IG/@misskayicheung)

嘉兒同高Ling在劇中針鋒相對,但私底下好friend。(IG/@misskayicheung)

嘉兒在劇中多數以OL Look出場,穿上短裙及高跟鞋展現優雅一面,完全看不出她只是剛生完4個月:「而家睇返套劇,嗰陣都算係修身成功,希望今次都係。其實我係有Keep住游水,所以唔算肥得好多,都有Toning(塑形運動)啲肉都唔會太鬆,而且我生完三四個月就有做返運動,飲食方面都係食高營養嘅嘢。」

嘉兒在劇中的OL Look獲網民大讚!(劇照)

嘉兒大住肚都有Keep住做運動。(IG/@misskayicheung)

+3
+2

要同時兼顧媽咪同演員的身份的確不容易,嘉兒在拍完《婚》之後也沒再拍劇,做全職媽媽:「嗰套之後冇拍過任何劇集,都有少少掛住個感覺,都幾開心嘅。但因為我好多時間都唔喺香港,我成日暑假都會返溫哥華三四個月,所以啲期難就啲,同埋之後又有咗BB喇。(有冇諗過再拍返劇?)都想㗎,不過今次隔半年先,因為上次隔咗4個月有啲趕,尤其是我全母乳,要成日離開BB其實冇咁好,咁6個月佢開始食固體就會好啲,不過都要睇下公司會唔會再搵我啦。」嘉兒透露最近在籌備出一本關於餵哺母乳的書,希望可以在7月書展推出:「我都支持餵哺母乳,希望可以透過呢啲相令香港嘅女士唔會覺得太尷尬,大家見到女士餵母乳時都唔會有歧視嘅目光啦。」

嘉兒在月初誕下二女,現在坐月調理身體。(IG/@misskayicheung)

點擊下圖睇嘉兒更多靚相:

+8
+7
+6


X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。