傳拜金兼爆樽扑前男友頭 楊詠彤:冇攞過佢任何錢全部係失實報導

撰文:
最後更新日期:

《2019香港小姐競選》上周日(8/9)完滿結束,而決賽中大熱之一楊詠彤(Katy)就五強不入。她周四(12日)出席《香港唱好演唱會》錄影時接受《香港01》訪問,坦言自己因落而失落:「一開頭聽唔到自己冧把的確有少少失落感嘅,不過諗返就覺得其實當晚嘅表現都未係話100%盡足全力。我覺得可以有更加好嘅表現,不過諗呢啲都冇用㗎喇,都係Move On,睇吓將來會有咩發展。」

Katy出席《香港唱好演唱會》錄影,她笑言自己都幾鍾意唱歌。(梁碧玲攝)

比賽結束後翌日就傳出負面新聞,有報道指Katy在參選前與圈外有米男友Vincent分手,更傳她在拍拖期間當對方是「人肉提款機」。不過她對有關傳聞就一一否認,並說:「其實呢啲全部係失實嘅報道,自己都有睇到呢啲新聞,其實我哋當時喺埋一齊,的確係AA制,我哋係財政獨立,唔存在任何拜金嘅謠言。」

Katy直言自己希望有機會在演藝界發展。(葉志明攝)

另外,該報道又指Katy曾在馬會兼職當Racing Angel負責舉牌,因為可以向有錢人埋身。Katy對此作出澄清:「其實並唔係咁樣嘅,因為嗰陣時我未選(港姐)之前,我係做model㗎嘛,咁我自己都有喺馬會度兼職做Racing Specialist嘅,咁嗰個時間我係主要畀我自己嘅心水畀啲客戶,接觸嘅客戶都係比較高級少少係真嘅,但係我就唔會話係為咗去識有錢人而係點樣囉。而當時我男友(Vincent)係知道我幫屋企人交緊租嘅,咁佢都有offer我話『咁交租嗰啲嘢需唔需要我畀錢你啊?』但係end up係一蚊都冇交易過囉,我最尾係冇攞過佢任何錢。」

Katy指暫時未收到關於跟TVB簽約的消息,所以暫時一切未知。(梁碧玲攝)

報道又指Katy與前男友爭執後曾「爆樽」擊傷對方面部,她再否認此事:「呢個其實都冇,其實我同佢分咗手之後已經冇再聯絡,但係我有係曾經聽講過佢係有整親過嘅,但係就唔關我事,因為我同佢嗰時已經分咗手㗎喇,至於點解佢會整親,其實我都唔知,我知你哋都可以聯絡到佢,可能你哋都要問返當事人先會比較清楚。」她最後也再強調跟對方分手後已沒有聯絡,有關報道都是失實的。

Katy對近日的報道作出澄清。(葉志明攝)



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。