【專訪】葉蘊儀出寫真騷本色 討厭獲封「美魔女」:唔尊重女性!

撰文:
最後更新日期:

80-90年代女神葉蘊儀(Gloria)自1995年結婚後便淡出娛樂圈,專心照顧家中兒女。2000年與老公離婚後便獨力照顧兒女,在2004年復出拍劇,更專心忙碌自己的生意。

現年46歲的Gloria用了半年時間去籌備她的攝影集(看起來是寫真集),這難免會令人說一句:「下,唔係呀,都46歲先嚟出寫真集?」,她解釋:「其實我以前都有拍過類似相集,但都係年紀好細嘅時候,其實自己都成長咗,想畀另一個感覺觀眾。」

Gloria挑戰性感尺度。(葉兆康攝)

點擊下圖觀看相集部份靚圖:

始終年紀不少,拍攝照片要擺一些性感姿勢困難相對高,始終不是18歲時候,沒有了那個青春氣息。當然剛剛提到她是想給觀眾的感覺不是青春而是成長了的她。但是有看到她之前的照片其實是挺「師奶」,難以想像能拍攝這些性感照片。所以為了擺脫「師奶」形象,務求拍攝最美照片,她進行了一次地獄式減肥,「我之前最高峰有130幾磅,經過呢幾個月,我都減咗30幾磅。」

談到減肥方法,她說:「每日朝早9點至10點我都會做一個鐘左右瑜珈體操,當做一個熱身。然後11點我開始食早餐,首先飲一杯齋啡同食一隻烚蛋。然後下午我會去再做運動,通常有私人教練會係到督促我,因為我唔係一個好叻做運動嘅人。咁每一日做運動都有唔同,例如有時會針對手、有時腳有時候腰,其實每日都有新驚喜。完咗運動我會去焗身,真係會出好多汗,成個人濕晒。之後再做保養同護膚上嘅嘢。然後到晚餐,我多數都係食菜同魚,每日唔同,咁大概一日食兩餐到三餐左右。都持續大半年。」

Gloria真係瘦咗好多。(葉兆康攝)

近年不少上了年紀的女性也會推出寫真集,她們也被人稱呼為「美魔女」,相信Gloria也可以用作這稱號,但是她聽到有點不高興甚至覺得侮辱,她說:「我唔係咁鍾意有呢啲形容詞擺係女性身上,例如美魔女、玉女、中女、女神等,我覺得有標籤畀女性係唔尊重。人哋可能會覺得係讚美,但我唔覺得需要標籤係女性身上。」

Gloria對於自己攝影集有好多諗法係裡面,佢當今次係佢重大突破。(葉兆康攝)

Gloria這本是攝影集,但外界歸類為是寫真集。其實這本攝影集Gloria開始有這個念頭、籌備、減肥、拍攝完畢後,是她很滿意的一個個藝術品,至於別人眼光並不在乎,「其實人哋要點睇,我唔覺得有乜問題,最緊要係做嘅人係咩感覺。如果佢哋覺得係寫真集咪寫真集囉,但對於我嚟講係藝術攝影集。」

Gloria指人生中有很多事情渴望去挑戰,現在還在尋找中。(葉兆康攝)

初入行的時候Gloria被喻為可愛教主,當年也拍攝過寫真集,相隔多年其實她並不想大家重提當年的她,「我已經唔係十幾二十歲嘅Gloria,我經歷咗好多唔同階段,我同以前樣貌都相當唔同。所以我唔會同我以前嘅相作比較,我會做依家嘅自己。以前十幾二十歲當然可愛啦,但我依家係sell成長嘅我。」 

葉蘊儀的體重並非在半年間一直保持下滑,她也曾遇上樽頸期。(資料圖片/葉兆康攝)

每一本書作者都希望會給觀眾一個訊息,這本攝影集尤其是女性,Gloria想讓她們收到一個訊息,便是女性身體自主主義,書中更有金句,她說:「赤子之心,呈現女性本色。我本書叫做赤色,點解呢,因為我鍾意紅色,同埋赤子係好純粹想做呢件事,冇諗過要同其他人比較,只係想做我想做嘅事。另外呈現女性本色,可能我哋喺富權社會長大,社會要我哋到某個年齡做某件事。我曾經都係咁,會畀社會規限,我最想同佢哋講唔好畀社會規限。」

唔知道大家睇咗Gloria嘅攝影集收唔收唔到佢想畀大家嘅msg呢?(葉兆康攝)

這麼多年來Gloria花了全副精神在照顧她的一對子女,接下來乖女即將上大學,她終於可以放鬆做自己想做的事情,Gloria笑自己是100分的媽媽:「做媽媽我差唔多完成,我可以做自己想做嘅。之前我會將我時候投入哂係屋企方面,不過我絕對唔係虎媽,我會畀好多自由度佢哋。我經常都同佢哋討論全世界發生緊嘅事,好似朋友一樣,自己係其次。」

Gloria大讚自己是100分媽媽。(葉兆康攝)



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。