【任噏亂評】台慶show無新意無誠意 TVB究竟仲有冇心慶祝生日?

撰文:
最後更新日期:

TVB台慶(2019年改名為《珍惜香港發放娛樂TVB 52 年》)在昨日「有喜無險」地完成,點解話有驚?因為早前網民曾發起在台慶當日到TVB門口示威,令到TVB在早一天已經預錄定節目,以便當日萬一真係有事發事,都依然可以播出錄影,繼續慶生!

不過,昨日未見有示威者到場,而TVB內更是人跡罕至,連藝人都唔見有!所以繼續播出早一日的錄影節目,「有驚無險」的跨過52歲生日。

連祝酒、切蛋糕都冇。

翻炒自己節目內容

講返個節目,相信不少觀眾睇完成個節目之後,都會覺得入面啲環節熟口熟面,除咗參考《娛樂大家》玩真假謊言,仲有港姐入面嘅快問快答,空中瑜伽的表演,不停將之前已經做過的節目再做一次,見到王君馨、黎諾懿同黃智雯跳舞,仲以為睇緊跳舞比賽。其中有一part,黃翠如、洪永城、蕭正楠和曹永廉四人出現的確有幾個笑位,不過都係玩有味笑話,略嫌低級。至於一開頭一眾藝人咪咀唱歌就冇特別,最後周柏豪菊梓喬壓軸獻唱亦沒驚喜,反而星夢派出菊梓喬而不是連詩雅,證明地位還是有差別。

即睇返昨晚的表演畫面:

張曦雯都已經好落力喇。

+54
+53
+52

【台慶2019】眾藝人戰衣率先睇 馮盈盈真空現身好驚喜

【收視滯後報告】從節目巡禮分析 TVB要重執昔日光輝不能再呆等​

藝員缺乏時間排練

大家都知道,台慶節目一直都是以表演節目為主軸,以前有阿姐唱《熱咖啡》,肥姐踩雞飛,華仔心口碎大石,吳剛師傅吞炭,梁朝偉用牙拉動載滿藝員的小型貨車,總之聽落都知係勁嘢,而家啲藝人唔係唔落力,不過真係忙到冇時間囉,玩空中呼拉圈的張曦雯都話自己冇時間練,其實冇時間練,表演又點會好睇呢?而且,今年嘅表演問題甚至唔係落係藝人度,而係度橋!表演節目炒冷飯,將以前嘅重新搬過嚟做一次,冇新意得嚟亦冇誠意,咁不如唔好表演,諗吓其他節目好過喇!

而家阿姐唔會同你玩喇...

取消才藝表演環節

其實上年有多年一直有玩嘅趣劇環節,今年連呢個都冇埋,善於搞氣氛嘅農夫又冇影,得返Do姐一個加上汪阿姐,氣氛只會係嚴肅,所以成個節目的確冇咗嗰陣輕鬆搞笑嘅感覺。作為一個幫歷史悠久的TVB慶祝52歲生日的節目,好像臨時臨急堆砌出嚟絕對令粉絲相當失望同難過,話晒都係一年一次,畀啲誠意出嚟整得好好睇睇唔係更好咩?唔通用舊橋觀眾會睇唔出咩?突然諗起昨日台慶騷最後一part,就係最後抽大獎嗰四隻公仔,有兩隻狗仔唔聽主人話,走埋一齊面對面唔肯行前,竟然係成晚睇得最會心微笑嘅一刻。

兩隻狗好有表演慾。

向經典表演致敬

節目效果其實除了靠藝人,仲要靠背後一群幕後製作去度橋,如果一直炒冷飯,其實人人都諗到。亞洲近年娛樂圈極速上位的韓國,都會識搞個藝人運動會,畀觀眾見吓藝人嘅另一面,點解TVB唔諗吓呢方面呢?唔使要藝人嚟嚟去去都係表演自家最強嘅項目,一年表演幾次,就算幾勁都悶喇,係咩?除咗搵啲新意思,其實重溫經典都係一個好玩法,叫王浩信用牙拉車,叫細細粒踩雞蛋,叫馬國明心口碎大石,有誠意得嚟收視一定爆!再唔係,如果唔可以年年都諗到啲新意出嚟,其實唔使年年搞,或者五年、十年先搞一次,儲足力量精精彩彩做一次好騷,唔係仲好咩?



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。