【白色強人】視帝馬國明豪氣請慶功:見人少少我請咗先

撰文:張嘉敏
出版:更新:

馬國明憑住劇集《白色強人》奪得無綫《萬千星輝頒獎典禮2019》最佳男主角獎項,該劇亦奪得《最佳劇集》,身為視帝的馬明就請大家食飯慶功。他笑言:「今晚係我請嘅,見人少少就我請咗先,啲勁嘢就等安仔 (郭晉安)佢嚟。大家拍得咁辛苦,係應該慰勞下嘅。今日珍姐又宣布咗開拍續集呢個好消息,真係好開心。(知唔知係咪原班人馬?)應該會係原班人馬,再加入一啲新角色,故事會係延續落去。」

馬國明請《白色強人》劇組慶功。(陳順禎攝)

馬明估計續集將會於年尾開拍:「上集咁成功係因為資料搜集做得好好,所以續集都要畀多啲時間去籌備,要寫好劇本先拍,唔想有遺憾。(第一集咁好成績會唔會有壓力?)無壓力,努力做好佢,盡力做好就得,希望觀眾會鍾意同埋支持。」問到他當了視帝之後可會加價,他說:「我係抵用價,香港經濟麻麻,我想多啲人搵我工作,今年農曆新年都有好多工作喺身,有出埠開騷,好好。」雖然他經已是視帝,但他覺得不代表什麼,也要不斷努力:「我好鍾意踢波,就好似英超咁,今季有好成績唔代表下季都一樣咁好,所以要繼續做好自己。」至於感情事他就話隨緣。

馬國明話感情事隨緣。(陳順禎攝)