【打天下】與Anson Kong埋身肉搏去到盡 談善言:現場受傷都唔覺

撰文:葉詩
出版:更新:

香港首部以空手道為主題的電視劇《打天下》將於下周一(13日)晚上9時30分在Viu TV播出,談善言(阿談)與MIRROR成員Anson Kong(江熚生/AK)今日(9日)出席記者會時談到早在開拍三個月前就跟本劇的監製、動作指導兼主演歐錦棠學習空手道,他們均認為這個師傅可謂十分嚴格,AK說:「棠哥對打好有要求,有啲細節冇咁輕易畀人過,記得有個難嘅招數拍咗八定十個Take!」阿談認同道:「棠哥捉動作、角度、發力都好嚴謹,尤其是武術更加認真!至於演戲方面佢就好Open,我之前分享咗啲意見都有加入劇本。」

談善言說拍攝時和棠哥打不算太大壓力,皆因練習的時候已經常常和他對打:「棠哥成日叫我哋唔使就力打佢,我哋搵佢嚟練都慣咗!」(陳順禎攝)

《打天下》的武打戲份不少,阿談與AK異口同聲說其實拍攝之前已經有受傷的心理準備,阿談更試過全身都有瘀青,她說:「拍嘅時候都預咗,始終入面嘅打鬥場面好多,一個禮拜都要郁幾次,所以傷都無可避免,始終大家都新,力度同角度都未必就得好精準。喺現場就算受傷都唔覺,通常係第日先會覺。」AK附和說:「因為當時嘅腎上腺素飆升得太勁!有時對打之前都會同對手講唔使留力,自己頂得順,可以大力多少少,出嚟感覺會真實啲,始終大家都想件事靚。」阿談贊同道:「佢成日叫我真踢落去,都幾捱得!」

談善言說到空手道訓練的初期,歐錦棠都是教他們一些空手道的基本知識,然後視乎他們的體能和柔軟度度身訂做武打動作予他們。(陳順禎攝)

這也是AK首次飾演戲份吃重的角色,他坦言壓力甚大:「演技比打更大壓力,除咗訓練空手道,導演同棠哥都用咗一段時間執我嘅戲,因為我開頭真係好緊張,但大家都慢慢幫助我進入狀態,兩個星期左右就拍得越嚟越舒服,成個Crew真係太有愛!」他又大讚對手阿談體貼:「阿談見到我緊張會喺化妝、食飯嘅時候主動同我對一次戲,然後再進入拍攝,咁樣令我舒服好多,佢知道我唔識都好照顧我。」阿談亦大讚對手AK:「學得好快,捉到個竅門去進入角色。」

+9

阿談與AK在戲中飾演一對歡喜冤家,及後更會發展到情侶關係,至於親密的戲份,AK笑說:「我哋成日都掂到對方,拳頭對拳頭嗰一種。」阿談就先對生粉(AK粉絲名)打定預防針:「希望AK嘅Fans唔好嬲我、唔好打我,好驚佢哋會憎我,對唔住啊,戲裡面嗰個係莊惠(角色名)!」AK就對生粉說:「大家唔準啊!談善言真人好錫我!」