過街英雄|唐嘉麟曾拒《中國有嘻哈》 專心拍劇︰冇TVB我冇人識

撰文:李婉文
出版:更新:

唐嘉麟(KT)近日頻頻有劇出,繼《十八年後的終極告白》、《迷網》後,無綫現正播放的兩套劇《反黑路人甲》和《過街英雄》都見到他的出現,曝光率夠多。《過街英雄》中,他飾演偵探社員工機智,戲份不少。KT在2009年在Rap歌手歐陽靖(MC Jin)幫助下出道,一首《Who is KT?》及VLT檸檬茶廣告,可說是洗腦式地在電視上播放,不過2012年加入無綫後他卻主力拍劇,原來曾因為一件事而令他「團火熄咗」。

KT在《過街英雄》的戲份不少。(劇照)

點擊下圖睇更多劇照︰

+3

現年35歲、加入TVB八年的KT,在入行前做過不同工作,做過電話銷售員、試過開服裝店、又做過售貨員,後來他得到MC Jin賞識,簽為旗下Rapper,當時MC Jin是《兄弟幫》主持,有一次叫KT上節目做嘉賓,之後監製就邀請KT一起做《兄弟幫》主持,因緣際會下加入了TVB。他接受《香港01》訪問時直言,曾經有機會出碟,可惜因為MC Jin回美國發展,計劃就告吹了。被問到會否覺得遺憾,他直言︰「直情熄咗團火,所以後尾冇做歌就專心拍劇。」

談到拍劇和Rap,他較喜歡哪樣?他說︰「兩樣都鍾意,Rap由零開始由自己包辦,成功感其實同我拍完套劇係一樣。」(Instagram@kt306kt)

2012年開始密密拍劇的KT,在《十八年後的終極告白》演出患有精神病的終極幕後兇手,演技備受讚賞,成為他的代表作。很多人都指在TVB,每個演員都會有「捱」過的時間,性格樂天的KT說︰「我覺得我嚟講唔算太捱,我嗰條線都係平穩斜上,又唔係話突然間上,突然間落,又冇,冇工開係咪叫捱?Touchwood又真係劇接劇,好好彩地,同埋生計呢邊Cover唔到,我會好快諗第二嘢,搵人一齊搞,做第二樣嘢。」他跟兩個拍檔合作搞車房,再加上家人沒有給他壓力,所以生活算是可以,「但當然都會有壓力,壓力就係來自自己嘅將來,錢你話夠唔夠使?有邊個夠使啊?除咗啲首富,首富都講到自己唔夠使㗎啦,所以冇得用呢樣嘢衡量囉而家,反而點樣去努力去做好自己每一樣嘢,去令到下一樣嘢自己會走埋嚟搵你囉。」KT說。

KT出道時有「MC Jin徒弟」的稱號。(資料圖片)

放低了Rap幾年,近年,KT又重拾對音樂的熱誠,去年在處境劇《愛回家之開心速遞》當中,一段「大四喜Rap」的表演爆紅,原來也是由他做幕後軍師。KT坦言是因為看了內地節目《中國有嘻哈》,所以決定再創作Rap作品。被問到覺得在香港做Rapper是否不能糊口,KT說︰「我覺得兩睇,睇吓你點睇音樂呢樣嘢,即係你要靠音樂搵食嘅時候,我覺得係難嘅喺香港,但係你話純粹興趣做音樂呢,又兩回事,所以冇得去咁樣比較,用音樂搵錢,或者用Rap去搵錢,其實係有啲難度,所以呢要自己平衡。」

KT跟拍檔合作搞車房,原來他也是一位改車達人,被問到收入如何,他說︰「都係打份工我同啲Partner當,始終而家啲價太透明,同埋我哋又唔係嗰啲所謂黑店。」(葉志明攝)

KT又直言︰「理想喺我心目中係用錢去堆砌」,理想是要先可以照顧好生活,才可以追求,他說︰「就算我而家冇錢,我可唔可以仲繼續做到演員呢?你又唔係男一、你又唔係紅,咁冇錢喎但,要生活,你一定要馬死落地行,搵第二樣嘢去Cover呢樣嘢。」原來《中國有嘻哈》第二季曾經邀請過他參與,可惜他當時有劇在身推卻了,不過他自言自己「未夠班」,而且普通話又不流利,就算參加也是輸居多,所以不如專心拍劇。談到在內地發展的機會,KT直言︰「如果有機會,當然想,但都係專心拍多啲劇先,因為你話我擦鞋又好,賣花讚花香又好,我覺得冇TVB都唔會有你呢個人出現,或者係冇MC Jin,呢兩個平台,(我)都根本冇人識,所以有時都係飲水思源。」現時除了拍劇,他也會積極拍片或用抖音放上網,吸引更多人留意他。

點擊下圖睇更多圖片︰

+4

同場加映,同劇演員江嘉敏嘅靚相︰

+55