譚炳文肺癌突然離世 好友薛家燕感痛心：我一直都想去睇佢！
撰文：吳子生
出版：更新：
「配音王」譚炳文今早（5/9）不敵肺癌逝世，享年86歲。對於好友突然離世，薛家燕接受《香港01》訪問時深表痛心說：「兩個月前，炳哥每日都有傳短訊畀我問候，叫我注意疫情，可以話係風雨不改，而且佢仲同我講呢兩日會檢查身體，可能會有幾日傳唔到訊息畀我，仲話出咗院後會再聯絡我哋，當時我就同佢講唔緊要，反而係你要多多休息。」
炳哥早前出席《流行經典五十年》。（資料圖片）
家燕姐續指因為疫情關係未能到醫院探望，「其實我一直都想去睇佢，而佢個女就話唔係好方便，因為佢哋去探嘅時候，都要經過好多重手續，係比較麻煩，所以一路都冇去探佢，咁所以我同炳哥只有用短訊保持聯絡。噚晚仲聽佢個女講炳哥身體冇事，點知半夜佢突然間唞唔到氣，點知佢今朝就離開咗，當然我聽到呢個消息真係好難過，畢竟大家相識咁多年，佢又睇住我哋大，我真係好難過，好唔捨得佢。」
家燕姐得知譚炳文離世深表哀痛。（資料圖片）