【幕後玩家】張繼聰口花花做兵仔:有咩事真係第一時間幫你!

撰文:
最後更新日期:

近期睇《幕後行家》,講到黃宗澤飾演的Sheldon,以為共聚天倫之樂,與正印Carmen及女兒遠走高飛,誰知在半途卻用盡言語,徹底傷透對方的心,不少人都看得咬牙切齒,覺得「有無搞錯!點解可以咁無良心。」停一停,諗一諗,就會發覺得最初對人口花花聲大大的Tim少,係全套劇入面最正常嗰個。而飾演Tim少的張繼聰,就覺得這個角色夠晒貼地,仲話「梗有一個Tim少在左近」。

攝影:梁碧玲

張繼聰笑言除了身邊的朋友,自己都有啲Tim少底,咀賤但夠雷。

張繼聰身邊的朋友就是活生生的例子,他們的善良心地及義氣,讓阿聰牢記一輩子,「我覺得朋友相處,錢銀解決到嘅就唔係問題,最重要係有冇喺心靈上幫人,我唔會記得自己點幫人,但絕對記得人哋點幫我。我身邊有好多Tim少,把口雖然賤賤哋,但心地真係好好,有起咩事上嚟真係第一時間幫你,所以我做Tim少,就會諗起佢哋,自然就會將生活所見到,放喺角色之中。」

記得《幕後玩家》初出街時,張繼聰將Tim少做得入型入格,輕易跑出。而過去的《老表你好hea》、《忠奸人》及《收規華》等,有張繼聰的話,他所做的角色都會是焦點所在,網民也很受落。張繼聰就覺得自己只是好彩,「呢行入面,好多人都好勤力,但有無天時地利人和呢?每個人都有,未必係而家,可能係十年後,根據自己經驗,最好就唔好太追求呢啲,如果唔係好迷失。」張繼聰認為追求結果就好似買大細,有人喜歡也有人討厭,沒有甚麼空間講自己有多努力,「若然係要停留呢啲位,我諗我好快會精神病,所以有人鐘意我做戲,會覺得係好彩。」

Tim少追女仔出盡牙力,雖然不能抱得美人歸,但觀眾至少睇得好開心。(劇照)

Tim少過去爆出不少抵死金句,最精警必然係「愛情退一步就人去樓空」,張繼聰表示有份同監製、編審諗金句,幕後人員才是最大功勞。甚至乎,Tim少咀裏常說的「神經病」,都是取材自平時日對夜對的工作人員。至於Tim少對住女仔口花花,放在現實生活中,唔知張繼聰覺得咁樣追女仔work唔work呢?「我由細到大睇過好多女明星嘅訪問,都話鐘意男仔夠幽默呀,鐘意運動又大隻呀……我諗女仔都想身邊有人氹自己開心。」咁……又有無好似Tim少咁追過女仔?「咁梗係有,但我同Tim少唔似嘅地方,就係我唔會去夜場,亦無立志要幾歲結婚。」

繼續學做好老公

事實上,張繼聰大大話話同老婆謝安琪結婚近十年,是不少人心目中的模範夫妻,經常見到他們不經意地「放閃」,認真羨慕。張繼聰自言與老婆有一套相處模式,關鍵在於經營。雖然是老生常談,但未必人人做到,「我覺得有童話故事,但就唔係從此之後快快樂樂咁生活,你唔駛做任何嘢。你都要去氹另一半,都要去學習、理解,我自己都學緊。」隨日子流逝,少不免會聽到「感情變淡」、「大家變了」這些死症,張繼聰認為變化是無可避免,人總會成長,願不願意體諒、包容,是一門藝術,「現在好多人關係唔長久,可能就係咁算啦,搵過第二個啦,會覺得下一個會好啲,但我覺得唔會,如果你唔去解決自己問題,下一個都會都係咁。所以我到而家都學緊,做個好丈夫、老竇或兒子。」

囝囝張瞻轉眼快十歲,未來還有囡囡出世,張繼聰一家四口,名符其實是美滿家庭,他坦言非常知足,「而家好享受生活,冇去求好多嘢,因為想要同需要,都係一線之差,你需要幾多呀?但你想要就好多,調節得到自己有着數,如果唔係就會日日都唔聚財,其實唔關個世界事,係自己個定位擺得唔好。」

Tim少就是如此有情有義,就算眼前的人只是前度,都會出手相助。

為人父母以身作則

據知囝囝得知媽媽懷的是妹妹,似乎有點Sad?「始終男仔都會想要細佬,我自己都係,小朋友唔會想像到生命嘅美妙,但近期佢見到BB一路成長,會踢媽媽個肚,佢都會覺得好得意,開始學緊點做一個哥哥。」所以,張繼聰作為爸爸,都要以身作則,讓囝囝有定心理準備,「如果講一句聽得明,呢個世界無人會坐監,父母係仔女仲細實係做好人,但都會盡本份,屋企嚴禁講比較嘅說話,唔會話『你睇阿妹幾好?阿哥無鬼用』呢啲說話,免得佢會覺得自己有嘢被搶走,但點樣再同妹妹相處,都係佢自己嘅課題。」

張繼聰表示有人鐘意他,都有人覺得他趕客,但不會太執着,不然會走入死胡同。



請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Microsoft Edge 或 Safari。為避免使用網頁時發生問題,請確保你的網頁瀏覽器已更新至最新版本。