TVB視后林夏薇自2015年與金融才俊莫贊生（Jason）結婚，升呢成為闊太，婚後的生活相當富貴，她更不時大曬市值15億的山頂獨立屋豪宅。不過日前突然傳出林夏薇被一間公司入稟高等法院申請破產，據司法機構網頁顯示，案件排期至本年8月26日進行聆訊，事件引起網上熱討。

今日（2/6）好友陳山聰現身將軍澳電視城出席無綫節目《人生美食地圖-東京篇》記者會，就事件接受《香港01》訪問時表示：「嗱真心，呢個太敏感，相關嘅事情就交返俾佢處理，始終都係一啲法律上嘅嘢。同埋我都費事打擾佢，但我相信佢哋兩公婆都識得點處理。」

被問到會否傳短訊慰問？山聰表示：「我諗呢段時間唔好煩佢，我諗佢都有好多事要處理，始終自己好朋友心照就得啦。（幾耐冇見面？）我哋都好耐冇見，同埋我都要飛嚟飛去，我諗等佢過晒啲事之後再搞聚會啦，因為佢就嚟生日。（會唔會冇心機搞生日？）我覺得佢唔會囉，因為佢係一個好樂觀嘅人嚟。」