林作前哨戰零底線露體都冇所謂 裕美爆:佢喺阿媽面前都裸體

撰文:葉詩
出版:更新:
拳賽門票已經作內部認購,最貴價值達2萬8,林作指:「應該冇咩人買,最後咪搵親朋戚友嚟。」(陳順禎攝)

林作與鍾培生的拳賽9月才上演,賽前一來一往的口水戰已相當精彩,二人將會在拳賽前拍攝17LIVE的特備節目《鍾林大戰》,不過二人周五(21日)出席記者會就堅拒並排合照,火藥味濃。林作攜女友裕美一同出席,聲言每日均勤奮練拳,更開始練成腹肌:「日日都練,越來越大隻、越來越打得,畀多四個月我覺得自己贏梗!」裕美亦認同此說法:「佢之前手瓜係軟嘅,以前我覺得自己大隻過佢,而家平衡返好開心,終於似返個男人。」對於早前被指與女教練對賽,林作就不覺女教練較弱:「女人好打得㗎,我隔籬呢個高手嚟!」

林作、鍾培生在記者會上堅拒合照,連訪問都分開做。(陳順禎攝)

至於答應拍攝前哨戰節目的原因,林作坦言:「因為有錢,我阿媽冇畀錢我,所以我需要錢!」他直言受邀金額達6位數:「都滿意,頂得到去9月,始終要打完先有100萬。」林作聲言已準備必殺技在前哨戰中先聲奪人,更不為自己設底線,談起近日《ERROR自肥企画》之尺度他就說OK:「露體露毛都冇乜所謂,我睇過節目都OK,呢啲尺度好濕碎!」裕美大爆:「佢最近先喺阿媽面前裸體,完全冇着!」

林作與鍾培生之間火花四濺,吸引了不少傳媒採訪。(陳順禎攝)

談起鍾培生欲邀林作前度麥明詩做拳賽嘉賓,他就含糊回覆指:「我唔知佢安排點,但係我當晚除咗拳賽冇辦法留意任何嘢,打完就走㗎啦,其他我唔知佢點。」在旁的裕美亦幫口道:「佢除咗眼鏡就乜都睇唔到!」