Anson Lo太圓滑易被人誤會 花姐︰大家唔了解佢就會用虛偽兩個字

撰文:李婉文
出版:更新:

ViuTV新節目《調教你MIRROR》即將播出,MIRROR有11位成員出席記者會(Edan呂爵安因工作未能出席),為節目造勢。而節目的導師梁祖堯(阿祖)和經理人黃慧君(花姐)也有現身,二人一同接受訪問。被問到會否想再做一個《調教你ERROR》的節目,花姐明言︰「我諗調教ERROR你(阿祖)會更加辛苦,因為你應該搞唔掂佢哋4個,你講一句佢哋講十句。」二人異口同聲表示不用調教ERROR。

MIRROR的節目《調教你MIRROR》即將播出。(梁碧玲攝)

今次要一次過「調教」12個男生,阿祖直言比拍《調教你男友》更有難度,「因為佢哋唔係素人,同埋觀眾對佢哋已經有個expectation,《調教你男友》嘅時候容易做嘅原因係因為呢一班真係一班素人,而佢哋真係願意嚟參加。但係我唔知佢哋(MIRROR)有幾願意,(花姐︰佢哋唔願意㗎。)佢哋唔願意,因為演唱會仲有幾個禮拜就做,佢哋一開始嘅時候(心諗)『點解我哋仲要嚟拍啲咁嘅嘢』。」花姐爆料原來MIRROR更有因為要拍這個節目而怪責她,她說︰「我記得佢哋係有鬧我㗎,『其實演唱會已經唔夠時間籌備,點解你仲要我哋嘥10幾日入camp,你有冇體諒吓我』,我記得佢哋係有咁樣鬧過我。」阿祖指一開始時,MIRROR對整件事也非常有戒心,不願意投入,但製作組又不可以向他們解釋,因為整件事不可以「穿橋」,被他們知道拍什麼。

花姐笑言自己也想加入「被調教」的行列,「我覺我呢件事好好,我見到MIRROR今次嘅成長,我係羨慕嘅。我都有講不如阿祖都同我傾吓偈啦,我覺得我自己都有好多嘢要調教,無論係我自己嘅心態,或者係工作方法,如果有個局外人同我講,我覺得對自己都好好。」(梁碧玲攝)

MIRROR在「被調教」完後,溝通增加了,被問到哪位成員的進步最大時,阿祖和花姐就各自挑選兩個人去點評。阿祖直言每個人都改變很大,但就有次序,有人先有人後,因為早前已講過Lokman(楊樂文)、AK(江𤒹生)、Ian(陳卓賢)、Alton(王智德),所以阿祖就選了Jeremy(李駿傑)和Jer(柳應廷)和點評。他直言Jeremy的改變好大,以前他將所有事都藏在心裏不說,「因為佢個夢想係做一個男團,然後佢所有嘢都忍,所有嘢都我為大家付出,冇所謂,所以佢冇脾氣㗎,佢好關心大家,好愛大家,但係佢索晒所有嘅嘢自己受,但係而家Jeremy終於會發脾氣啦,終於大家講啲咩唔啱聽嘅時候,(佢會話)『我真係唔開心』,佢會直接講出嚟。」

花姐笑言MIRROR入camp的12日,是她這兩年來最輕鬆的12日。(梁碧玲攝)

至於Jer,阿祖覺得他本身也是一個慢熱和內斂的人,花姐苦笑說︰「但係阿Jer而家識駁嘴啊!」阿祖︰「佢話要同好熟嘅人,佢先會駁嘴,即係話佢同大家都真係開始熟。」花姐就講Tiger(邱傲然)和Anson Lo(盧瀚霆)。花姐和阿祖都大呼︰「好鍾意Tiger!」花姐覺得Tiger是一個好禮讓和被動的人,他每次都會說︰「哥哥做先啦!」、「我大把機會,我第日大個」,將機會讓給隊員,花姐說︰「但係身為佢媽媽,你就會好忟憎啊,你可唔可以積極啲,你積極啲可能你得到更多機會呢,其實你係得㗎嘛,你有才華㗎嘛,如果唔係我都唔簽佢啦,但佢又要收收埋埋自己,就係為咗畀機會人。但係經過咗呢個節目之後,佢好似知道,我畀機會哥哥唔代表我自己唔爭取,咁佢就開始表達到好多佢嘅嘢畀我聽,呢個轉變係令我覺得,大個仔啦咁!」

阿祖拍在「調教營」中,他是「狂喊」的一個,他說︰「我個人好易被觸動,啲嘢美好啲我就喊,我唔會因為慘而喊,我會因為啲嘢好美好而喊嘅,我係泡咗無限咁多次眼淚,我諗製作組都會覺得多到煩啊,所以佢唔伯剪咁多出嚟我估。」(梁碧玲攝)

阿祖又發現姜濤跟Tiger非常不熟,所以要成立「姜虎關注組」,他說︰「因為我頭幾日camp嘅時候,我發覺佢哋完全冇講過嘢,永遠都係姜濤坐呢邊,佢就坐另外一邊,直頭係唔識啊我覺得佢哋。」直到有一晚他叫二人一起對話,叫他們要和對方做朋友,每日要和對方講50句話,說什麼都可以,阿祖大爆一開頭他們就不斷在「猜枚」,是他們友誼的開始。他又大爆他對二人說了一番話,不知道鏡頭有沒有影到,他說︰「其實你兩個係MIRROR裏面最細嗰兩個,MIRROR第時係靠你哋兩個,然後嗰班哥哥係會攰,佢哋係會老㗎,你哋仲有好多路要行,但係你哋兩個就係之後要pick up呢件事,所以你兩個而家要做朋友,你哋而家要一齊mon住呢件事點樣行。」見到他們開始做朋友,阿祖笑言感欣慰。

花姐和阿祖都大呼︰「好鍾意Tiger!」(梁碧玲攝)

花姐講到Anson Lo的改變,她說︰「Anson Lo以前大家會覺得佢係一個好有禮貌,好gentle嘅人,咁佢真係好gentle,但係佢gentle嘅背後係因為佢覺得咁樣就唔會得罪人啦,大家會見到佢最友善嘅一面,唔會令人難受,但係因為咁大家就會唔了解佢,就會用虛偽兩個字、世界仔(形容佢),都唔係好嘅term,經過呢個camp之後,我同佢相處,又係令我難受,佢黑我面而家,佢會表達畀我睇,以前佢唔會同啲兄弟講有咩唔滿意,但係佢而家會好真實咁同啲兄弟講,呢個真實嘅Anson Lo反而係令大家覺得近咗。」阿祖指現在Anson Lo會直接問Anson Kong是否黑面,以前他一定不敢這樣說。

花姐就表示姜濤是一個慢熱的人。(梁碧玲攝)

再講到人氣王姜濤,他很多時接受訪問時,在團隊中不算多言,花姐就表示他是一個慢熱的人,阿祖︰「你會喺節目裏面會見到另一個佢,你會見到真正嘅佢。(花姐︰一個好成熟、好有諗法、好識照顧人嘅人嚟嘅,不過佢始終慢熱,佢未必可以對外表現到呢樣嘢就真嘅。)」而花姐在看完Lokman的一集也「爆喊」,現在說起也想哭,她說︰「我發覺原來好多嘢我唔係了解得佢咁深,我從佢把口(聽到佢)親自講呢番說話嘅時候,我有啲覺得我欠咗佢嘅,但係佢嘅改變又令我好感動,所以我喊得好緊要。」

點擊下圖看更多MIRROR的靚仔相,更有Anson Lo和Jer絕密「出手」畫面!

+33

點撃睇更多《調教你MIRROR》花絮照片:

+54
發表評論...