代溝關注組｜江嘉敏遭TVB同事借錢唔還十幾萬 親口追數慘食檸檬
撰文：張國基
出版：更新：
無綫綜藝節目《代溝關注組》繼續以長輩李家鼎（鼎爺）、Maria Cordero（肥媽）VS一後生仔江嘉敏、蔡嘉欣、徐文浩、游嘉欣、林正峰。昨晚（23日）播出一集開始扭橋，現場「查錢包」睇現金量，結果肥媽一人袋$8,100現金聲稱買海鮮至少都要2千，大幅拋離後生仔的總數$1,230。
游嘉欣認係慳妹，慳到無錢拍拖。（影片截圖）
+2
今集主題是「醒見理財有錢途」，游嘉欣自認慳妹：「當然工都要努力返，但都要從源頭慳，我拒絕社交，唔出街，留喺屋企，自己帶飯，搭公共交通工具，務求唔使錢。」區永權搶問：「所以就唔拍拖喇？」游嘉欣竟然承認：「係，呢個係其中一個原因！」
江嘉敏今集又次引爆話題，她說最多試過借5千元給朋友，但原來是每次5千，反反覆覆借過好多次：「呢個朋友都幾聰明，每次出街食飯都唔帶現金，又會話電話壞咗過唔到錢，我唔係記仇，雖然我係，哈哈哈，佢仲要一定食米芝連，都係我埋單，加加埋埋可能10萬都有。」之後她不慎自爆「朋友」原來是公司同事：「我試過喺公司見到佢，厚住面皮問吓佢『你細佬讀書讀成點？啲學費……』佢之後即刻話『啊，埋位喇？』我心諗電話唔聽又唔覆message，當面問到都咁？」
被逼請食飯，每次要江嘉敏自己埋單。（影片截圖）
+1