曼聯忠粉孔德賢覺得要炒蘇斯克查:佢冇做錯不過係未夠實力

撰文:李婉文
出版:更新:

無綫於周日(31日)舉行「愛心曲奇暖萬家」慈善義賣活動,藝人孔德賢(Danny)亦有出席支持。雖然是萬聖節,但Danny就表示自己明天好早要開工,所以也沒有什麼節目。不講不知道,原來Danny是忠實球迷,更是曼聯的忠粉,他接受《香港01》訪問時,一講曼聯就講到「停唔到」。現年24歲的他,原來自2007、08年開始就已經喜歡曼聯,因為受爸爸的影響喜歡,至今已14年時間!他說︰「見證住王朝嘅崛起,見證住衰退嘅時期,去到而家,唉!我都唔知講咩好啊!而家呢個好尷尬嘅時期。」

Danny出席「愛心曲奇暖萬家」慈善義賣活動。(周倪瑩攝)

被問到Danny會否覺得曼聯領隊蘇斯克查應該被炒,他直呼︰「係啦!我覺得佢要被炒,其實佢冇做錯嘅,只不過係佢未夠實力,因為其實曼聯每一個球員佢哋嘅質素都已經係世界頂尖,即係位對位嚟講,佢同其他國家(球隊)嘅人排,其實佢哋都係top 5實力水平,但係蘇斯克查嘅戰術,就好似維持咗佢師傅費格遜,之前打過『4-4-2』嘅陣式,咁佢個陣式其實都係冇乜組織,都係『高Q大棍』一嘢掘上去,搵C朗搵卡雲尼咁去頂波啦,其實佢冇一個好中間配合到嘅章法,即係好多時候都要靠球員嘅天才波。」

Danny一講足球就講到眉飛色舞。(周倪瑩攝)

另外,Danny覺得除了蘇斯克查在進攻方面有責任,麥佳亞在防守方面也有不足,「雖然佢係(有)好高嘅轉會費,亦都係英格蘭嘅一個中堅,但係喺個表現唔得嘅情況之下,反而試吓連迪路夫去搭華拉尼可能會好啲,同埋琴日贏咗熱刺3:0,嗰場試咗個3中堅,其實我覺得曼聯可以試吓喺呢個低潮嘅時期做多啲防守先。」曼聯早前贏熱刺3:0的一場賽事,Danny當然亦有看,「基本上5後衛,前面兩個中鋒,雖然兩個中鋒畀人笑加埋70歲,兩個都35歲,足球上面嚟講係比較老嘅一個前鋒組合,但係我覺得以佢哋嘅經驗,同埋佢哋可以趁60分鐘前左右去用盡佢哋嘅體力去踢,同埋要做好防守先。」

Danny覺得曼聯是靠球員們的天份,才可以「符符碌碌」入波,沒有太多漂亮的攻勢。(周倪瑩攝)

Danny又講到上場曼聯大敗給利物浦0:5,「完全係俾人羞辱咁樣,雖然俾人大炒之後,第日我都着件波衫出街,我都冇乜所謂,但係我覺得真係要好好咁樣去執咗個防守先,同埋換教練(領隊)我覺得係必須!(有冇睇到想喊?)唉!我一路睇一路笑,冇嘢好講!因為我覺得俾人大炒固然係一個好恥辱嘅嘢啦,仲要係主場,望住啲球迷提早走。本來今季係好大期望,後面又買咗華拉尼,咁貴,前面又有英格蘭新星辛祖,再加埋C朗。」Danny總括覺得最大問題是領隊,而今年曼聯都是靠「符碌」,踢不出實力,希望之後他們會「踢好啲」!

+1

同場加映︰多圖︱梁凱寧換秋裝騷美腿 感性發文反思︰希望可以愛自己多一點

+80