【心理追兇】殺阿媽屍水溝牛雜　何遠東演精神病者：見到牛雜都驚

無綫劇《心理追兇Mind Hunter》，顧名思義，每個單元也會有兇案發生，由飾演心理學家的馬國明，運用專業知識破案。近日案件圍繞着牛雜麵店發生，而麵店老闆娘馬海倫神秘失蹤，最後浮屍海面。劇中飾演他兒子阿文，正是肥仔何遠東，平常慣演喜劇的他，今次角色相當沉重，皆因他的角色不但是殺人兇手，而對象更是他的母親。

劇中何遠東一個齊陰冬菇頭，蠢鈍呆滯，但煮牛雜時卻有板有眼，不過他烹調的牛雜，卻不是人人夠膽食，劇情最新發展，是牛雜帶有強烈臭味，而聰明的網民已經紛紛估計是何遠東殺母後，再熬製成人肉牛雜，諗起都令人作嘔。何遠東接受《香港01》記者訪問，他表示：「拍嘅時候我都諗會唔會殺咗阿媽，再斬碎咗做牛雜呢？其實編劇、監製真係有諗過，後尾覺得唔出得街，始終電視有尺度。(最後只講到屍水流入牛雜內才發出臭味)對住煲牛雜其實好大鑊㗎，會成身牛味，依家見到牛雜都驚。雖然只得5集戲，但拍嘅時候我好抑鬱成日喊，抽離唔到角色。」

知悉網民大讚角色入型入格，何遠東表示很開心，很多謝大家支持，「我本身係一個舞台劇演員，之前一路俾人話啲演技好浮誇，動作好大呀，唔信你做到呀，俾網民鬧到七彩。接咗呢齣劇之後，我俾咗個功課自己，要用眼神做多啲戲，試吓啲微表情，從而顯露個角色特點。自己一路去諗，點樣去豐富呢個角色，不停對鏡去做表情同眼神，拍電視係咁，要試好多次去搵自己嘅可能性。(有冇參考乜嘢人嘅角色？)冇話參考邊個人，咁多年都係咁，想創造一啲嘢出嚟，最考演員係一開始唔可以俾人覺得受重視，頭幾集導演特登唔俾大頭我，拍到好唔起眼，等人估唔到係我，我自己都忍口唔穿橋，連屋企人都冇講。」

田蕊妮《巨輪》細佬係舞台劇男主角　何遠東入大台被嘲：你咁肥得唔得㗎？

一場在網台上的獨腳戲，講到何遠東上了王君馨的節目，聲淚俱下尋找失蹤媽媽，講述兩母子多年來相依為命，真摰感人，甚為催淚，想不到他竟然是弒母真兇。何遠東表示：「呢場戲我背熟晒對白，做咗好耐準備，一take過冇NG㗎。」何遠東自言拍到有點人格分裂，皆因劇中患有精神病的他，根本不知道自己弒母，甚至忘記了這段慘痛記憶，「有時講我清醒，有時又講我唔記得殺咗阿媽，要俾到唔同嘅反應，所以自己都預先mark低晒，mark得好辛苦。有人讚都開心嘅，有人仲話我年尾叫糊添，其實都唔係簽咗tvb，邊會有獎攞呢？贏口碑囉。」

除此之外，劇中何遠東會力追女神蔡思貝，又買花又送熊公仔，但肥仔要越級挑戰，當然是食檸檬收場，問到他現實生活的愛情經歷，何遠東卻給了一個出人意料的答案，「我自己嘅愛情係慘淡嘅，以前有一段好穩定嘅感情，不過冇咗啦，最後結唔到果，做呢行冇乜時間俾到另一半。好細個識嘅，都差唔多拍咗有十年，入行之後就冇咗。(為做演員放棄段感情？)我又冇咁偉大，但人大個咗，大家目標唔一樣，分開時都和平嘅，OK啦。拍呢套劇都有代入少少，其實拍嘅時候好投入，俾思貝拒絕已經好傷心啦。」演員等的就是一個有得發揮的角色，何遠東今次終於等到了。