無綫年度盛事《萬千星輝頒獎典禮2022》昨晚（8/1）圓滿結束，各個獎已塵埃落定。鄧智堅憑劇集《下流上車族》奪得「最佳男配角」，順利擊敗其他對手。

今日（9/1）鄧智堅現身電視城出席無綫新劇《虛擬情人》拜神儀式。對於喜獲「最佳男配角」獎，鄧智堅表示：「今日心情就冇尋晚咁激動，但起身嗰吓就好朝氣同好有能量咁嚟開工，精神上好有動力。（收到好多恭賀短訊？）係呀，WhatsApp收到過百條短訊。尋晚食完個消夜返到屋企沖埋個涼都覆唔晒，搞到成今朝6點先瞓，瞓咗兩個鐘，個人又好抗奮又醒咗。」

有否翻睇得自己得獎時的表現？鄧智堅大感失禮：「其實睇返片，覺得自己好醜態好失儀，好似劈雷觸電咁嘅感覺，成個人真係震晒，面部表情真係控制唔到，加上自己不停眨眼，嗰吓真係好失儀，希望真係唔好嚇親街坊。不過睇到好多同事企咗喺身拍手，我真係冇諗過。」