鄺靜汶喉嚨生瘜肉 手術後變「鵝公喉」救唔番：醫生講明會變差
撰文：吳子生
出版：更新：
鄺靜汶（Cindy)今日（13/1）現身尖沙咀出席無綫新春賀年節目《新春開運王》宣傳造勢活動。模特兒出身的Cindy近年轉戰影視圈，正式成為演員，她透露初時未懂習慣：「因為以前做模特兒嘅時候係唔需要講嘢，主要都係俾人影，但當我做咗演員之後，講嘢嘅次數係多咗好多，變咗對住鏡頭時需要學識執生，同埋要轉數快，真係唔可以成舊飯咁，懵吓懵吓咁。」
鄺靜汶聲線比較吵啞。（吳子生攝）
對於有網民指她聲線沙啞，似「鵝公喉」，和清秀外表成一大對比。Cindy表示：「其實我以前唔係，喺我2019年嘅時候，我做過聲帶手術，醫生話我喉嚨生咗兩粒瘜肉，講明做完手術情況係會差，所以變成而家咁。不過呢樣嘢變咗係我嘅特色嚟，就算見唔到我，聽到我把聲就知係我，哈哈。李丞責話過女仔把聲線係溫柔嘅，就容易問人攞錢同容易俾人養，但強調聲線好似我咁，就唔會過影響財運嘅，咁我都安心啲。」
鄺靜汶相信風水命理。（吳子生攝）
鄺靜汶今日出席《新春開運王》宣傳活動。（吳子生攝）