黃翠如曬繑手合照被網民斥消費洪永城 蕭正楠：我覺得好無謂
撰文：吳子生
出版：更新：
蕭正楠（阿蕭）日前（8/4）現身將軍澳電視城，出席無綫綜藝節目《思家大戰》錄影。早前阿蕭愛妻黃翠如出席無綫頒獎典禮時，與洪永城繑住手行紅地氈，事後第一時間出post，貼出二人的翹手合照，隨即被網民狠批又再消費洪永城。
早前阿蕭愛妻黃翠如出席無綫頒獎典禮時，與洪永城繑住手行紅地氈，事後第一時間出post，貼出二人的翹手合照，隨即被網民狠批又再消費洪永城。（IG@wongtsuiyu）
蕭正楠接受《香港01》訪問時表示：「首先我就冇睇啲網民講嘅嘢，如果自己搵嚟睇就傻囉，講真有咩好睇啫，睇完又冇咩可以幫到你嘅。不過都唔緊要，始終講嘢都係佢哋嘅自由嚟嘅，而我又覺得又唔係啲咩咁大嘅傷害。而我就覺得只要我哋幾個好朋友，心知發生咩事就得。就好似洪永城太太同我，起碼唔覺得係咩事，加上根本就係冇事。好多唔好嘅事，令到好多好純潔嘅友誼破壞咗，我係覺得好無謂，咁所以我就唔會太多理會。（太太有時會唔會睇？）我就覺得無謂增加一啲負能量，因為大家都學識咗抽離咗呢個環境，仲咩要睇呢？（太太初初都會睇！）佢唔會有太大感受。（你唔使輔導吓太太？）哈哈，我已經好叻，我已經輔導咗佢10年啦，呢10年我一直輔導緊佢，佢已經係一個好強嘅女孩子。」
蕭正楠對愛妻黃翠如愛護有加。（陳順禎攝）
蕭正楠今晚出席無綫綜藝節目《思家大戰》錄影。（陳順禎攝）