毅行者3連冠前無古人 陳國強難忘第二冠靠熄燈戰術迷惑對手

撰文:
最後更新日期:

陳國強(KK)在1998到2000年連續3屆贏得毅行者冠軍,獲得「毅行者先生」的外號。KK承認首屆奪冠有點運氣,被人質疑,所以他在第二年加倍努力,跑出14小時內的成績,在激烈競爭下再度封王。他說:「第二次贏,我都眼泛淚光,因為真係做得好,好在頂得到!」

了解KK的消防搜救經歷:

接觸跑山為做好份工 最怕曬黑但投身消防|毅行者先生陳國強專訪

丁利華行西貢人間蒸發 KK山嶺搜索生涯唯一懸案|毅行者先生專訪

KK在90年代被派駐西貢消防局,開始接觸越野跑,但他最初只是抱住「做好呢份工」的心態上山,希望更了解西貢的郊野及山徑,方便以後的山嶺搜救工作。直至有次,他下班行山,坐在西灣山的山腰休息,望住一班人由東壩石屎路落到浪茄,轉眼間,他們已行過沙灘,開始上山,很快就經過KK身邊。KK那時覺得很震撼,原來有人可以行山行得那麼快!

KK在90年代接觸越野跑,與同事組隊出戰毅行者。(顏銘輝攝)

那時,KK與跑得最慢的一位60歲伯伯聊天,知悉對方為備戰毅行者操山,這是他人生第一次聽聞毅行者。望住那位伯伯健步如飛,續往西灣山上去,激起KK的鬥心。他說:「我嗰陣36歲,你60歲都行到,我冇理由行唔到。開始問自己,想改變人生,突然撻着啲嘢!我人生係咪就咁完呢?結咗婚,有咗宿舍,有仔女,升咗職,等出糧,拎退休金,之後就係咪等死呢?」

KK決定參加毅行者,但他首先要找3名隊友同行。在那個年代,毅行者的名氣不大,就算聽過的人,大多覺得這是一項自討苦吃的活動。KK處處碰壁,由局內手足,到同期師兄弟,人人回絕,「唔好玩啦!傻咗咩!人哋話玩完之後跛咗幾個星期。」

KK在訪問中談到在1998年到2000年的毅行者3連冠。(龔嘉盛攝)

好不容易找齊隊友去操山,但KK被隊友一條問題考起!KK說:「有個就話『你唔係有張籌嘅咩?』我話籌咩籌,我剩係知道唔知醜(籌)!」這時候,KK才知道參加毅行者要輪籌報名。不過,那年毅行者已經截止了,幸好健行之友旅行隊領隊李維安之後幫KK張羅到一隊參賽名額,令他在1996年可以首次參加毅行者。

🏃🏽‍♂01體育行山專頁:靚景推介 裝備介紹 人物訪談🏃🏾‍♀

🏃🏽‍♂行山前先睇路線片:咖喱山行山攻略🏃🏾‍♀

🏃🏽‍♂立即訂閱01體育Youtube頻道,了解更多行山及體壇資訊🏃🏾‍♀

比賽前,KK未試過行足100公里,那時也沒有「操雙坳」的訓練方法,他跟隊友將麥理浩徑分開3段操(北潭涌至水浪窩、水浪窩至城門、城門至屯門),每段需時8至9小時,他們期望24到27小時內完成毅行者。結果,他們造出18小時33分,以全場第10名完成,成績令人驚喜。

KK分享他以前跑山的照片。(龔嘉盛攝)

【1997年的毅行者手冊】

+3
+3
+3

衝線後,他們已經打算在1997年再參賽。KK說:「全場第9係警察,我哋跟住佢尾返去,有人幫佢哋補給,但我哋乜都唔識,連有個公務員組別都唔知。我哋話,出年秘密操行啲,發一發力都贏佢啦!」

雖然完賽那一刻很風騷,KK及隊友還取笑中途不支的隊伍,幸災樂禍,但一晚過後,他感受到毅行者帶來的痠痛。翌日他的大腿及臀部痛到行動不便,他很記得到酒樓食飯時,要扶住通道兩邊的椅背,慢慢行到桌子。他笑說:「最辛苦係去廁所,坐咗喺個塔度,起唔到身。」

KK在1996年首次參加毅行者。(KK Chan 毅行先生Facebook)

兩星期後,痠痛消去,KK及隊友行山癮再起,又約出來操山。他說:「每次操練,都講返嗰毅行者啲嘢,講來講去,聽到都悶,四條友仍然係咁講,咁就一齊玩多年,卒之跑到第三。」在1997年毅行者,KK的隊伍以17小時25分鐘完成,登上三甲,比首屆參賽快了個多小時。

KK的隊伍在1998年再創佳績,過了城門後領先,之後帶到終點,以15小時25分贏得冠軍,比之前一年快2小時,「嗰時都好激動,有少少眼泛淚光」。然而,KK這個毅行者冠軍卻受到質疑,他說:「第一年贏,啲人話我哋符碌。(點解咁話你哋?)因為啹喀有個受傷。」

【KK在1998到2000年完成毅行者3連冠】

「玩運動係有時要啲符碌,但好唔好運之外,你首先要做好付出,做足原定計劃,咁你先至有機會符碌或者好彩。第二年我哋要話畀人聽,唔要符碌同好彩,真係用實力去贏。」KK那時估計,要造出14小時內的成績,才能在1999年衞冕,所以與隊友不斷操練,改善不足之處,「14個鐘係我條線,練到幾辛苦都要練」!

那年,有個新隊友加入KK的隊伍,KK向他先旨聲明:「我話你跟我嗰隊玩要好大付出,冇晒私人時間。佢就話反正冇拍拖,但如果你拍緊拖的話預咗散,要六親不認。」

在3次毅行者冠軍之中,KK講得最多的是1999年那次,因為那次競爭最激烈。(顏銘輝攝)

說起1999年毅行者賽事,KK滔滔不絕,他說:「第二次贏,我都眼泛淚光,因為真係做得好,好在頂得到!」他表示這是贏得最驚險的一屆:「鬥足成條麥徑,鬥得好激,你要成日望番轉頭,一入夜就見到後面啲燈追住嚟。我哋落到針山馬路,就見到佢哋啲燈喺針山頂落緊嚟。」

落完針山的樓級後,就接上馬路,往草山進發。(顏銘輝攝/資料圖片)

「一去到四方亭,見到後面啲燈已經出嚟,我哋一到石屎路就即刻熄燈,令佢哋睇唔到我哋,我哋嗰年仲著件黑色背心跑。佢哋喺後面落緊嚟,我哋就咬實牙根,搏晒老命係咁跑上斜路。」KK形容當年的戰況:「(熄燈係戰術?)佢哋睇唔到我哋,鬥志會冇咁強。」

在1999年毅行者,領先的KK團隊一落到四方亭便關上頭燈,摸黑沿馬路跑上大帽山。(顏銘輝攝/資料圖片)

過了大帽山頂後,KK不敢再有保留,出盡全力跑。他說:「睇住啲電筒光,三四隊一堆咁喺後面係咁追落嚟,又啹喀又mixed team,又team green鬼佬,我哋乜都唔理,繼續跑。落到補給站拎完嘢食就快啲行,快啲走,發盡飲奶嘅力衝到返屯門終點!」

由大帽山頂起計,不用2小時就跑回終點,KK的隊伍果然造出14小時內的成績,以13小時54分首先衝線,再奪冠軍。KK也覺贏得險,「去到尾都係贏9分鐘」。

KK在2000年再以14小時多的成績贏得毅行者。(龔嘉盛攝)

KK在2000年再組隊,以14小時多的成績,完成3連冠創舉,他表示這一年贏得較輕鬆,他說:「贏到甩晒,其他人都唔敢挑戰。佢哋都想贏,但去到馬鞍山、慈雲山之後已經頂唔順我哋。做過兩年之後,我哋已經知贏硬,保住唔受傷就得,咁就順利贏到3屆。」

當年KK有沒有想過要爭4連冠呢?他說:「冇喎,我覺我3連冠已經好好嘢,樂施會都特登造咗隻大啲嘅盃畀我哋,香港未試過,但隻盃已經送咗畀贊助我哋嘅公司。」

順利完成毅行者3連霸後,KK的心態轉變,目標由贏冠軍,變成幫助更多人參加毅行者。他說:「我已經好怕每年搵人嘅感覺,試下打開道門,等人哋投嚟玩!」這20年來,KK桃李滿門,成為香港著名的毅行者教練。

【同場加映!了解更多行山冷知識】

與其問人難度幾多「星」,不如問以下問題更實際:

+2
+2
+2

決定原路折返的4個重要因素 回頭也是一種勇氣

5星難度路線有幾難行? 每人心中都有一把尺

了解中暑症狀與處理方法 從路線規劃起預防中暑

學做負責任登山者 4個方法避免行山留垃圾

行山前先了解行山禮儀:

+10
+10
+10

教你用「GPS遠足留蹤」服務:

+8
+8
+8

建議放入背囊的行山裝備:

+12
+12
+12


請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Microsoft Edge 或 Safari。為避免使用網頁時發生問題,請確保你的網頁瀏覽器已更新至最新版本。