看盡山中無奈事 願將所得扭乾坤|毅行者先生陳國強專訪

撰文:
最後更新日期:

3屆毅行者冠軍陳國強(KK)桃李滿門,被學生視為鐵面教練。KK也承認自己是一位嚴格的教練,如果學生違反他訂下的規矩,他一定會鬧人,甚至會將對方逐出師門。他說:「同我一齊玩係緣分,大家要珍惜;唔同我一齊玩,係我嘅福氣,我唔使咁麻煩,你估我好過癮!」

了解KK的威水史:毅行者3連冠前無古人 陳國強首冠贏得有運 「第二年唔要符碌」

KK在2000年完成毅行者3連冠創舉,之後改變心態,初時為樂施會辦訓練班及講座,逐漸成為教練,教導新手參加毅行者,到2010年創辦毅行教室。他說:「都係座山教我,我本身乜都唔識。喺山度學番嚟,放番喺座山度,放番畀啲人,我覺得咁幾好!你識咗嘅嘢,就唔好收埋,多啲講畀人聽,反正你係帶唔走。」

【KK在1998到2000年完成毅行者3連冠】

KK會為學生訂出完成毅行者的目標時間,要求學生跟住他的計劃訓練,到比賽當日,他亦要學生跟從他訂出的分段時間去跑。無論在比賽,還是訓練,KK常常提醒學生不要「做大」。「做大」,是指你的速度比KK為你定出的分段時間快,如果不減慢的話,很有可能「爆偈」,無法完賽。

KK跑山經驗超過20年,他笑言在山上見證幾代人跑山。(顏銘輝攝)

他說:「有啲人問我,點知做唔做到(呢個時間)?你唔知,但我知,我同你去定,定咗出嚟,你唔好意圖挑戰我定出嘅時間。只要跟足我嘅目標,一格一格咁去做,到最後你有本事的話先去衝。」曾有學生不從指示,在比賽中「做大」,最後KK將他逐出師門,「佢唔可以再留喺呢度玩」。

KK除了參加毅行者,還參與了其他山賽。(龔嘉盛攝)

數到令KK最憤怒的一次,他在訓練中提醒一隊學生速度過快,怎料聽到學生駁嘴:「我哋未爆過,我想睇下點爆!」KK聽到後已經黑面。結果,那隊不聽他勸的學生在針山上不適,連鉛礦坳都行不到去。那隊學生之後還在聊天群組批評KK,不應在天氣那麼熱的時候操山,並指「周山都有人爆」,他們「爆偈」也是正常的。

跟KK訪問兩個多小時,他由比賽講到做教練。(龔嘉盛攝)

有人將聊天群組的截圖傳給KK看,他更加憤怒。KK在訪問中說起這件事,依然「勞氣」:「既然周山都有人爆,咁你自己玩啦,使乜跟我哋玩!我就係要話你知,唔要你哋出事,唔好好勝。頭段如果『做大』咗,你係上唔到,爆咗之後好難回得番。我哋咁有經驗,都要半個鐘到45分鐘先回到個人。」

做KK的學生,有兩條必守的「門規」。毅行者4人一隊,所以KK規定每次跟他操練時,一定要4人同時出現,他強調:「一定唔可以唔齊人出嚟操,呢樣我最憎。」在山上,他要永遠見到學生4人一起行,絕對不可以有人太快,拋棄隊友。

另一條規矩就較特別,他說:「我同學生講明,跟我期間有啲活動唔玩得,你唔好走去爬澗!」以KK多年消防拯救經驗,他認為行澗很易發生意外,他解釋:「如果你因為好勝行澗出咗事,3個隊友點算好?對你嘅隊友會好唔公平,你咁係好唔負責任。」他亦要求學生跟他毅行訓練期間,不可參加其他比賽,避免他們受傷,影響出戰毅行者。

過去20年,很多名人慕名拜師,希望KK幫到他們完成毅行者:「有勞永樂、養和醫院院長李維達、3個副院長,仲有商台嗰班DJ。我曾經同蘇絲黃去行撒哈拉(沙漠),仲有啲大機構老闆……」但KK對所有學生一視同仁,他說:「我話知你明星唔明星,教授唔教授,有錢唔有錢……我講嘅你一定要聽,我話知你係乜CEO,我都照抦!」

【KK在山界獲獎無數】

KK會跟名人學生約法三章,他講起那次教李維達的養和醫院隊伍玩毅行,要求他們每星期出來練一次,每次都要齊人,「如果一個月有兩次唔出黎,就當冇講過……唔好同我解釋,我唔鍾意聽人解釋。」李維達的隊伍跟足KK的指示訓練,最後以33小時完成毅行者。

做了那麼多年教練,KK知不知道自己在學生心目中的形象如何?他不假思索地說:「黑口黑面,唔出聲,成日鬧人。」說罷,他在毅行教室的工作伙伴都不禁大笑起來。

KK認為他在學生心目中是一位黑口黑面的教練。(顏銘輝攝)

由搜救到跑山,由比賽到開班,KK在山頭野嶺奔跑半生。他說:「有人同我講,過咗40歲就跑唔到毅行者,點知我冇事仲愈跑愈快。我50歲後仲快,12個鐘嗰啲紀錄全部都喺我50歲之後做出嚟。」他笑言現在愈跑愈有,操完「雙坳(北潭坳到荃錦坳)」或者跑完馬拉松也不覺太累。

🏃🏽‍♂01體育行山專頁:靚景推介 裝備介紹 人物訪談🏃🏾‍♀

🏃🏽‍♂行山前先睇路線片:咖喱山行山攻略🏃🏾‍♀

🏃🏽‍♂立即訂閱01體育Youtube頻道,了解更多行山及體壇資訊🏃🏾‍♀

不過,KK都有為自己的越野跑生涯設下終點,「如果睇嘢唔夠清就唔跑,隻眼決定我跑唔跑落去。如果我70歲仲睇得清,又做到18小時(完成毅行者)就繼續跑。如果我80歲,5個鐘完成唔到全馬,我就唔會再跑,唔好再獻世,唔好阻住人哋。」

KK在60歲以14小時 49分完成100公里的毅行者路線。(KK Chan 毅行先生Facebook)

KK除了教授跑山技巧,還將按摩及保養身體的心得傳下去,讓學生可以避免傷患及意外,像他那樣由30歲跑到60歲,長跑長有。他說:「我都有離開、走嘅一日,我鍾意傳承落去,尤其呢幾年,我更心急要傳承多啲,放手多一啲。」

了解KK的消防搜救經歷:

接觸跑山為做好份工 最怕曬黑但投身消防|毅行者先生陳國強專訪

丁利華行西貢人間蒸發 KK山嶺搜索生涯唯一懸案|毅行者先生專訪

「希望將自己嘅經驗話畀人聽,有兩句說話,成日提醒我,『看盡山中無奈事,願將所得扭乾坤』,但半夜私底下仲有兩句提醒自己,『談何容易,仍要堅持』,係咪好無奈?」說罷苦笑,又續道:「我所有嘢都喺山上得嚟,我做咁多年山上拯救,見盡救得返、救唔返……有能力做多啲就做啦。」

KK希望將自己在山上學到的知識及經驗傳給更多的人。(顏銘輝攝)

後記

與KK的訪問超過兩小時,記者覺得他的五官輪廓有點像藝人張國強(也是叫KK),故最後不禁問他,有沒有人覺得他像張國強?

KK笑言沒有,「啲人成日話我似混血,有人問我,多唔多女仔追?女仔點追我,我就唔知,我喺山度追人就多!」

「黑口黑面,唔出聲,成日鬧人」的KK,其實是個愛說笑的人。

KK笑言,有人覺得他像混血兒。(顏銘輝攝)

【同場加映!了解更多行山冷知識】

與其問人難度幾多「星」,不如問以下問題更實際:

+2
+2
+2

決定原路折返的4個重要因素 回頭也是一種勇氣

5星難度路線有幾難行? 每人心中都有一把尺

了解中暑症狀與處理方法 從路線規劃起預防中暑

學做負責任登山者 4個方法避免行山留垃圾

行山前先了解行山禮儀:

+10
+10
+10

教你用「GPS遠足留蹤」服務:

+8
+8
+8

建議放入背囊的行山裝備:

+12
+12
+12


請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Microsoft Edge 或 Safari。為避免使用網頁時發生問題,請確保你的網頁瀏覽器已更新至最新版本。