去年神準預測港股牛轉熊 沈大師:個市好毒 首季料見熊一底!

撰文:
最後更新日期:

「牛衰熊起」,恒指2017年累升36%,去年不復勇,全年掉頭向下14%,嚇煞不少股民。覆巢之下,也有「完卵」。訊匯證券行政總裁、人稱「沈大師」的沈振盈,去年初已叫人「一股不留」,自言表現「冇得彈!」

來到2019年,港股開局奇差,首日瀉逾700點,認真「運滯」。只好請沈大師再為大市把脈,港股究竟是冬去春來,抑或只是由寒冬走進嚴冬?

2018年過去,沈大師以「大淡友」身份,年頭贏到年尾,有何感想?「今年(2018年)都冇得彈,搵唔到咩因素彈,中間有一、兩禮拜誤差就唔算啦⋯⋯大方向分析,中!美金要升,中!人民幣要跌,中!8至10月叫人美股一股不留,中!A股(跌)破3000點,又中!唯一係樓市未爆煲......」

沈大師自言去年成績「冇得彈」,一雪「燈神」之名。(鄭子峰攝)

大師:「同以前股災好唔同 今次係隻慢熊」

港股去年雖然無爆出一個核爆級的負面消息,但在美國加息和中美貿易戰等因素影響下,恒指「唔覺唔覺」曾累瀉近9000點。沈大師直言,今次跌市與以往暴瀉式股災很不同,更加「毒」,「今次個市係陰吓陰吓咁落,唔同07、97年咁大上大落,大家會識得走。(去年中)29000至30000點行咗成5、6個月,引咗好多人以為冇事,然後入返市,跟住10月再插落黎,唔覺唔覺,死咗!你見指數無咩嘢,但個股就死得好緊要,毒就毒在呢度!特別啲北水股,好似醫藥、內房、物管、汽車股,好多都腰斬!」

據大師經驗之談,慢熊源於基金大戶想「離場」,如果一次過大手沽出,難以找散戶「接火捧」,因此要慢慢出貨,「慢熊就係大戶派貨唔會再買,個勢就『鋸齒型』拖長咗,一浸浸困住班人。滙控(0005)就好明顯,80蚊慢慢跌到70蚊,再跌到落60蚊,根本就係大手派貨!」

沈大師相信,以往的9年牛市是由印銀紙「印」出來,資金資金離場,不外乎中美「無水」。其一,美國為走利率正常化路線,以免經濟崩盤,所以加息和縮表均在所難免;其二,由於中央強調去金融槓桿,目標打擊影子銀行、理財產品,收緊信貸規模,防止金融危機。「中國一收水,美國一收水,全球無水,個市同經濟一定要落!已去到一個階段,唔可以因為驚股市冧、唔可以因為驚經濟下調而唔做﹙收水﹚!」

沈大師稱,今年恒指將走慢熊路線,首季有機會見熊一底部。(路透社)

首季料見熊一底 只能小注博反彈

一切只因錢作怪,沈大師仍然悲觀,相信低處未算低,現時只是熊市一期,受美股追跌、中國企業債到期等因素困擾,料今年首季港股最大機會出現比較「深」的底部,「熊市三期個底就估唔到,依家熊一最樂觀、最保守由高位都跌3成落去,即係去到23400點,如果參考2007年嗰次跌35%來計,就即是21700點,所以我估21700至23000點就熊一底,如果有咩「意外」,穿一穿20000點都夠!」

不過,大師提醒,現在遠不是大舉投資的時刻,只可小注博熊市二期反彈期,「上次港股反彈11月最長彈一個月,因為今次熊市比以前長,所以熊二反彈期都會比較長,以往一般行2至3個月,今次會行4至6個月。(未來)唔應該大舉投資,但係你話中間控制住個注碼,淨係作一個中線,就係熊市二期反彈,可以!」

即使不買股票,大師提醒各位可買黃金避險,「一定要買黃金,1,200元附近就要買,因為黃金是將來其中一個保障,雖然是現金為王,但黃金幫到你做對沖,做保險的工具,用來平衡你持有現金風險。」

沈大師指,特朗普有機會以香港作為衝擊內地的缺口,香港經濟隨時受拖累。(路透社)

細數「灰犀牛」事件     香港走資最「大鑊」

談及今年有可能出現的「黑天鵝」、「灰犀牛」事件,大師認為「灰犀牛」較多,除了人民幣兌美元有機會穿7算,以及內地企業債問題之外,大師還提到,香港今年有可能成為中美貿易戰的風眼,香港隨時不堪一擊!

他認為,如果特朗普以他現在的部署,正常下一步策略就是集中火力對付香港,因為對付香港是衝擊內地的其中一個缺口。「好老實,香港現在其實不堪一擊,樓市泡沫去到這個階段,銀行結餘係好多,但這是外資的錢。大家好似覺得這萬幾億元放在金管局貨幣基礎永遠不會走,我不明白為什麼?能夠進入就自然會走,這個才是對港股最大的衝擊!」

不過,大師亦補充,暫時無人知道錢幾時要走。如果上述「灰犀牛」真的出現,香港將很大鑊,「97年個底仲係度,07年有阿爺救你,但依家香港靠邊個去救?特別係樓市泡沫危險度、膨脹力度已係核彈級!」



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。