騰訊終極「沈判」 沈大師︰當內需股去睇 200蚊係好值買

撰文:
最後更新日期:

去年股王騰訊(0700)爆升神話不再,著名股評人訊匯證券行政總裁、人稱「沈大師」的沈振盈,去年老早唱淡股王,成為「十年磨一劍」的另一代表作。

他直言,騰訊已經不是一隻增長股,極其量是一隻存在隱憂的內需股,散戶只能吼位買︰「我睇唔到騰訊上得返400蚊,因為好難再做到4成盈利高增長,股價最盡都係350蚊。但如果用廿幾倍PE(市盈率)來計,更值得買,所以我一路都話200蚊係好值買!」

沈大師直言,騰訊無力重回400元水平,最多只值350元。(鄭子峰攝)

「炒到470蚊係戇居 騰訊最盡值350蚊」

在股王騰訊身上,大師看到不少股民用個「價」去看「價值」的通病。「(散戶)見過470元,就會以為400蚊抵,350蚊仲抵,到300蚊仲抵!但其實根本炒上300蚊都唔值,炒上400蚊係過份,炒到470蚊係戇居,大行仲話上到5百幾,直情係搵笨!」

沈大師直言「往者而已」,看不到騰訊重上400元的理由,因為目前已很難再做到每年盈利增4成的情況,「騰訊員工同管理層係好有活力,某個時段亦做到好高增長,亦創造到價值,唔係話騰訊依家無價值,只係唔值呢個價,正常你當佢係內需股!」然則,大師睇目標價是?「其實最盡都係350蚊。如果用廿幾倍PE(市盈率)來計,更值得買,所以我一路都話200蚊係好值買。」

更為關鍵的是,沈大師認為手遊業務「唔洗望」,而雲計算、支付等業務,長遠不會全由騰訊「揸旗」,一定納入中央。「錯不在公司本身,不過在外國就係『大到不能倒』,在中國就係『大到不能再大』,呢個係政治生態。可能日後有其他公司會競爭騰訊嘅地位,有可能佢做嘅嘢,俾另一間公司搶晒,科技就係咁,好似Yahoo畀Google掃晒咁,所以你買定佢(騰訊)10年後增長係好危險。」沈大師解晝。

以目前因素看來,騰訊爆升神話將難再出現。(視覺中國)

「去年幫騰訊求得下下籤 個心已經笑咗」

除了利用基本面分析,大師去年初亦到過黃大仙為騰訊走勢求籤,並求得下下籤,「黃大仙求籤一向都準,我平常有難題就求,嗰次幫騰訊求條『岳飛遇害』,個心已經笑咗,因為我知贏硬,仲諗『黃大仙有冇咁準呀?』。我幫屋企人求過同一條籤,屋企真係發生咗事......」翻查資料,籤文為61號籤──十二金牌召岳飛,內容是「十二金牌速召回 奸雄設計幾時灰 可憐一旦功勞散 老少扶車不斷哀」。據「解讀」,籤文暗示騰訊前途暗淡,籲股民勿高追。

除了求籤之外,他亦希望給散戶帶出股市陷阱處處的信息。去年1月,有位老人家跟他說,「大師,我仲有一注錢,究竟買平保(2318)定騰訊(0700)好。」他續道:「但當時騰訊四百幾蚊,平保就九十幾蚊,點買姐?周圍環境渲染到買呢啲係冇得輸,俾我聽到,我一定要改變呢啲歪風。叫人保守係因為想保險,後生嘅可以去博,但去到某個年紀應該求穩陣。」



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。