甘比訪問|手袋常備辣椒油?華置CEO創KUUKee 安全感一件衫搞掂
一個時裝品牌創辦人,最緊張的竟然不是潮流剪裁、布料質地,而是衫袋夠不夠多、電話紙巾卡有沒有位放?甘比(陳凱韻)以華置CEO、「大劉」劉鑾雄太太為人熟悉,近日多了一個身份——針織時裝品牌 KUUKee 創辦人。
俗語話「衣如其人」,更何況是一個人自己創立的時裝品牌?認識甘比,倒不如由一件衫說起。身居高位、丈夫家財萬貫,卻沒有高不可攀的架子。她接受《香港01》訪問時,沒有大談時尚理論,講的都是生活裡的「安全感」與「開心」:衫要「colorful」、要實用、要令穿戴者心情好。從衫要衫袋,講到出街食飯自備辣椒油,這位老闆的「玩味」原來很貼地。
靈感非天馬行空 只想人「著咗開心」
一個人的穿衣打扮與儀容風格,往往反映其性格特質、生活態度、審美品味與社會身份;而創立時裝品牌,大概更見一個人的內涵。甘比今年創立KUUKee,主打色彩豐富、溫暖而實用的設計,名字有「Kooky(玩味)」之意,希望為穿戴者轉換心情。
訪問開始時,記者提到甘比身上穿著的衫「好colourful」、「好warm」,問她靈感來自哪裡。甘比爽快答,靈感來自她一直以來的生活態度,「我想表達開心嘅感覺俾人,希望帶開心俾人,所以希望啲衫colorful啲,大家著咗嗰日會開心啲、心情好啲。」
她指自己多年來喜歡買衫、襯衫,很清楚自己需要什麼,於是將靈感放入設計,例如加入褶皺(waffle)元素,又有衫袋增添實用,「有個袋就好好多,我仲要特別多袋,好方便;剪裁又可以遮肚腩,有陣時有啲『fancy』 嘅感覺。」她又笑言自己不太懂擺甫士拍照,有袋可插住手,拍照會自然些。
這份「實用」並非單純裝飾,她希望KUUKee的衣服放在衣櫃裡「永遠都攞翻出嚟著,永不過時!」
衫袋多過手袋 安全感一衫收納
講到設計中最實用的一環—— 口袋,不得不提她口中的「安全感」。甘比說:「都市人比較忙碌,好多時唔記得個電話擺咗去邊,有個口袋喺度就穩陣啲。做媽媽又會帶多啲紙巾、濕紙巾、卡,一次過袋晒落去,有時唔記得帶啲咩都搵得返,好有安全感。」
千億富豪的另一半,還怕要親自「拎東西」?外界必然以為她身邊有很多助手幫手,隨傳隨到,但甘比笑言,助手其實也很忙,「佢哋要做好多嘢,我都有幫佢哋拎嘢,冇乜所謂。助手係幫你,但如果你已經做到嗰啲嘢,又冇必須要人幫。」她稱,不會因為身份是老闆就不做,「好多嘢都唔可以因為你個身份係boss就唔做!」
甘比訪問|人生如針織無需補針 日睡最多4小時︰瞓覺係嘥時間!
穿自家衫開會 為氣氛「暖場」
這份實際與隨性,也延伸到品牌名字。KUUKee有「Kooky(玩味)」之意,希望為穿戴者轉換心情。被問到自己做過最玩味的事,甘比笑言:「我本身係一個唔係好玩味嘅人,反而有啲朋友覺得我玩味。因為我好鍾意食辣,就算出街食嘢都會帶定辣椒油,好多鋪頭可能得辣椒醬,但我鍾意辣椒油,我會咩都加,有時加大成碟,人哋會覺得『哇你好勁,飲個湯都加』!」
雖然品牌如甘比本人一樣玩味、個性十足,但她稱,設計不是想「譁眾取寵」、特別引人注目,而是想大家穿上後開心、精神,自然會有自信。「好多時女士揀衫,可能睇心情,唔知著得好唔好睇,心情都麻麻哋。我希望每個人著上身已經好妥當,唔需要諗著得靚唔靚、人哋點樣睇,而係你自己個心情。」她認為,以前一代可能比較拘謹,現在更注重舒適度。
這份「著得開心」的念頭,也延伸到她的工作場景。甘比現在身份橫跨華置CEO、品牌設計師和母親,被問到以不同身份穿上KUUKee開會的感覺,她說:「覺得好舒服、好精神,呢種能量令你喺商業決策上面都唔會咁傳統,我自己都唔係一個咁傳統同死板嘅人。好多時開會都想用輕鬆啲嘅方式,著咗呢套衫,個氣氛可能已經降溫、暖場啲。」
手袋四寶:CEO、小朋友、自己、設計師
甘比透露,心裡已有很多設計想法,未來會推出配飾、襪等。至於手袋,她指會考慮,但希望整得靚、得意才推出。問及若手袋只能放四樣代表自己的東西,她的答案是會放手機﹙方便處理商業決策﹚、Pick-up Card﹙接送證,代表母親身份﹚、毛冷與鉤針﹙代表甘比自己﹚,以及一條紫色圍巾﹙代表品牌設計師﹚,「因為我鍾意紫色,同埋攞呢條巾可以周圍穿搭,又可以宣傳下KUUKee。」
如果說開會著衫是向外傳遞輕鬆,那麼消費者身上,她最看重的是甚麼?甘比指出,KUUKee最打動她的是色彩和背後故事,「我做出嚟都係希望大家開心,同埋大家會諗到一個手作嘅溫度。都市人好繁忙,好多時會忘記咗開心係咩,不停面對好多唔同挑戰,少咗忽略自己。手作嘅溫度俾佢哋知道,其實呢個世界好溫暖。」她笑言,現時生活最開心是從頭到尾都可以做到自己喜歡、熱愛的事情,投入去做。
不貪心上市 望全世界認識KUUKee
這份投入,如今也放在KUUKee的下一步。甘比表示,產品成立初期有很多事情要跟進,一開始沒料到反應這麼好,品牌早前在金鐘時尚名店JOYCE獨家發售並舉辦預覽,部分款式首30分鐘便告斷碼,大部分貨品需要預售。
既然反應比預期好、品牌可以做大一些,她指接下來會多放時間在KUUKee;即使忙碌,也不會覺得辛苦,因為有興趣、有熱誠去做。品牌亦已落實11月底衝出香港,進駐首爾潮流名店BOONTHESHOP旗下的CASESTUDY,與韓國市場見面。她說時間由自己分配,同一時間可以處理很多事。
至於會否做美妝,她直言興趣不大,除了工作要化妝,自己不太懂化妝,也不熟那個範疇,未必會想做,但也不排除突然去學而做出成績,不過KUUKee推出之後,有很多不同範疇的品牌找她合作,她要慢慢看是否適合、是否做得到。
對KUUKee的願景,甘比希望全世界都認識KUUKee,「大家諗到KUUKee就好開心,已經好開心,其他就唔諗住。」她表示不貪心,不會以上市為目標。品牌目前以線上為主,但收到不少意見希望親身試穿,因此會慢慢實踐,不排除在香港或其他地方開實體店,與華置旗下商場合作則看形式,「最緊要夾,唔夾就唔會夾硬嚟!」
由一個「想人著得開心」的念頭,到衫袋裡的安全感、開會時的一件自家衫,甘比做KUUKee的邏輯其實很簡單:實用、舒服。她沒有將品牌說成宏圖大計,反而更在意大家穿上身那一刻的心情。對這位仍會幫助手拎嘢的老闆來說,如果一件衫可以令都市人多返少少開心,已經是一個好開始。