昔日股王思捷爆升 股壇猛人莊友堅教路 買股前先買衫 |珍姬蜜

撰文:珍姬蜜
出版:更新:

港股呢排浮浮沉沉,尤其喺加息陰霾下,大型科網股及其他高估值股份「難逃一跌」,想喺金魚缸搵食已愈嚟愈難!大股冇運行,反而二、三線股卻相對活躍,近日缸邊友金睛火眼留意住嘅其中一隻股票,非思捷(0330)莫屬。

呢隻昔日股王思捷升至「紅底」後爆煲,本來要已擺落「櫃桶底」,但近日卻異常生猛,恒指年初至今跌約15%,思捷股價反而逆市由7毫子大升1.2倍至約莫1.6元,突破三年高位。

醜股翻生,總有原因。中南證券揸弗人莊友堅妻子、維他奶(0345)後人羅琪茵近年大手入股思捷,持股比重已升至近28%,成為最大單一股東。羅琪茵入股思捷,莊友堅「角色」相信也不少,思捷的國際總部便位於他北角華匯中心的「大本營」。

講起莊友堅,稍有股齡的朋友,都知道他縱橫股海逾30年,活躍細價股,而羅琪茵也有唔少資本操作,兩人出手,點石成金無咩出奇,但「空降」昔日明星服裝股,唔少缸邊友都有個「黑人問號」——搞邊科?同一條問題,小珍去年便問過莊友堅,他當時笑笑口話「每個人都著衫,需求很大!」答案似「阿媽係女人」,但思捷易主後,新主積極「換血」,重新打造品牌,又不似講笑。

思捷易主後,股價逆市大升1.2倍至1.6元,突破三年高位。(資料圖片)

親自操刀度橋救業績

眼見思捷近日熱炒,小珍就梗係要問吓熟悉思捷嘅朋友,聽講莊友堅對思捷每條賬目都瞭如指掌,甚至連歐洲邊度稅務重都知,親自度橋睇吓點樣可以慳錢。「老細(莊友堅)不嬲都好美國佬style,鍾意自己睇、自己做,而且覺得啱就去做,就算打官司都要做。早年告美林就係咁,告完冇嘢㗎,之後美林咪繼續同老細做生意。」

講緊嘅係2013年莊友堅相關之公司入稟高院,向美林索償逾4.2億元。原訴指2008年受美林一方誤導,借出約7,050萬元予德發集團(0928,現名蓮和醫療),結果公司清盤,原訴無法收回大部分還款,欠債連同利息現超過4.2億元,要求美林賠償。

小珍近排去北角做GYM,見到有啲藍眼碧髮嘅歐洲人出入華匯中心,忍唔住再向老友八卦,原來係思捷嘅高層。「老細好有心想做返好盤生意,歐洲收入貢獻大,特登請啲外國人返嚟落手落腳做,親自同佢哋開會同傾策略。」

思捷結束亞洲業務,主力谷起歐洲嘅零售及批發生意,及發展網上店舖業務。(網店截圖)

股壇猛人教揀股 十分「Peter Lynch」

此話不虛,思捷近年改革「大破大立」,先係將唔賺錢嘅亞洲業務結束,主力谷起歐洲嘅零售及批發生意,同埋發展網上店舖業務,就連總部也由九龍灣高銀金融國際中心搬到北角老闆商廈, 月慳近20萬租。

小珍睇翻思捷最新2021年度成績表,收入83.16億元,雖然較2020年全年收入92億元少,但經過一輪操作,已由一年蝕近40億元,改為賺3億元,扭轉過往5年虧損情況。

基本面有向好跡象,加上莊友堅「溢價」,股價有哂上升的理由。近日不少缸邊友均有斬獲,小珍之前難得到北角同莊生食飯,已把握機會問呢位股壇猛人,幾時先可以入手思捷,佢當時笑住講,「有一日你覺得ESPRIT啲衫靚,睇個網站想買佢啲衫嗰陣就係時候喇!」答案有啲玄,但好似Peter Lynch(彼得林治)選股法,著重喺日常生活中尋找潛力股。睇黎小珍買股之前,要做嘅係買多幾件衫先!

你可能感興趣