今次身水身汗，走遍港九新界5間車輪餅店，為的是試真哪檔車輪餅最好？車輪餅（又名紅豆餅、大判燒）。傳統以紅豆餡著稱，亦是最為人喜愛的。如今新口味賣創意，推出抹茶餡、紫薯餡、吉士餡，甚至夾雜麻糬、肉鬆和Oreo。究竟傳統好？還是創意高？攝影︰尹嘉蔚

我們10人試食兵團，經過一輪盲試後，把寄居超市連鎖店與民間小店的的車輪餅，以其餡料味道、餅皮質感、價錢等逐一比試，並以10為滿分，逐一較量。還要看看以下好真實的正負食評！

太安樓小城滋味　紅豆真實比例適中

原味紅豆餡$10/個總評分：7

正︰「甜味適中。」「紅豆最靚又滑，豆香濃。」「見到紅豆有真實感。」「皮有啲脆咬落鬆軟。」「皮有有芝士味鹹鹹地都Ok。」「餡與皮的比例適中。」負︰「唔特別。」「紅豆好甜。」「皮無味有啲韌。」

小城滋味地址︰筲箕灣筲箕灣道57-87號太安樓地下A47號舖查詢︰6633 0118

樂富匠工房秀吉　紅豆清新外皮味淡

原味紅豆餡$8/個總評分：6

正︰「紅豆滑溜有豆香。」「皮算鬆軟。」「餡與皮的比例尚可。」「唔膩入口清新。」負︰「紅豆味好淡。」「皮無味。」「似麵包。」

匠工房秀吉地址︰樂富聯合道198號樂富廣場2樓UNY

美孚車輪餅小姐　加麻糬Oreo創意混亂

三餡（紅豆、麻糬加Oreo）$11/個總評分：4

正︰「咁多餡放埋一齊平衡咗味道唔覺膩。」「幾得意有驚喜。」「皮卜卜脆。」負︰「紅豆味唔滑好淡。」「三隻餡放埋一齊味道唔夾，好奇怪，唔知食緊咩。」「麻糬好難消化。」「皮無咩味、好硬。」

車輪餅小姐地址︰美孚美孚新邨吉利徑19號50B7號舖查詢︰6687 1093／9079 6687

葵涌廣場魷味　鹹甜混雜似食肉鬆包

三餡（紅豆、麻糬加肉鬆）$10/個總評分：4

正︰「鹹甜混合幾好味。」「有驚喜有層次。」「皮幾脆。」「唔膩口。」負︰「紅豆被肉鬆搞到鹹咗好恐怖。」「唔鹹唔甜好怪唔夾。」「紅豆唔滑無豆味。」「味道被肉鬆蓋晒。」「皮有啲厚似食肉鬆飽。」

魷味地址︰葵芳葵富路7號葵涌廣場1樓B01D號舖

銅鑼灣Sweet House Cha Cha　味道平淡又最貴

原味紅豆餡$14/個、抹茶紅豆餡$16/個總評分：5

正︰「紅豆餡算滑溜。」負︰「紅豆唔甜，味道攻鼻。」「餡太多唔啱比例。」「皮好韌、好膠。」「抹茶味車輪餅沒有抹茶味。」

Sweet House Cha Cha地址︰銅鑼灣勿地臣街1號時代廣場B1樓 cookedDeli by city'super查詢︰2917 7228