【飲食KOL】研究食物史每日follow幾百人 歎港人畀like好孤寒

撰文:
最後更新日期:

隨便在Instagram碌幾碌,滿街都是Food Blogger,追蹤人數從幾十人到幾十萬都有,無他,因為這是KOL空群而出的年代,也是有人出一個Post比起你打整個月工賺得還要多的年代,加上人人每天都會吃東西,要當「食家」的門檻似乎比起其他界別的KOL低。不過,當市場已到了飽和甚至氾濫的狀態時,願意付錢請人試食的餐廳為何要非找你不可呢?我們找來了其中一位Food Blogger Sawyer接受訪問,想成功吸引餐廳「畀錢你賺」的話,他認為最緊要就是走條與別不同的路線,找出自己的存在價值。

26歲的Sawyer兩年前仍是學生,決定跟女友Holy開始成為Food Blogger的原因非常簡單,「因為我哋成日出去食嘢,越食越貴,好似一食完落肚就所有嘢都完咗,其實係咪可以做多啲?」只有Instagram一個平台的他們,追蹤人數比起其他Food Blogger並不算多,大約9300人左右;出Post量跟那些天天賣廣告的人來比,有正職在身的Sawyer更只是每月更新四次。然而凡事總不能只用數字來衡量,他覺得為自己的專頁尋找存在意義更為重要!

Sawyer(右)跟女友Holy一同經營Instagram近兩年,可惜訪問當日女方並不在港,未能一同受訪。(受訪者提供)

如上文所言,儘管很多人自費食餐飯、寫兩句「好好味!」已能自詡「飲食KOL」,Sawyer卻一直務求靠內涵取勝。有人說,這年頭沒人喜歡睇字了,尤其是Instagram這些平台,相夠靚、片夠豐富已經足夠,可是出Post量「貴精不貴多」的Sawyer卻堅持寫長文,樹立自己風格,「唔知點解越寫就越想寫多啲,滲下滲下就好多,淨係寫食物嘅味道已經百零二百字,再介紹返餐廳環境,好易就寫到800字。」他以「魚蛋論」解釋當日初衷:「香港好多Food page會話啲嘢『真係好好食。』但唔會形容。好似魚蛋咁,有人鍾意食彈牙,有人鍾意食腍嘅,你話好食,鍾意食腍魚蛋嘅人睇到你話好食,可能佢Expect個魚蛋係腍㗎嘛,我就會一開始寫咗好食嘅魚蛋Suppose就係彈牙,咁相比其他網站,個標準客觀少少,爭拗咪少啲。你真係覺得魚蛋腍好食,咪唔好去嗰間餐廳囉。」

Sawyer和Holy的Food Page經營了兩年,出Post量行「貴精不貴多」路線,所以只累積了百多個Post,但每篇內容都非常詳細。

除了關心食物是否美味之外,他也從餐廳背景及食物製作方法著手,帶給讀者更多資訊,一切原來跟大學時選讀的學科有關,「我自己讀日本研究,畢業論文就係寫日本Food history喺明治時代有咩改變,所以對食物History都有少少研究。」但翻看其Instagram,介紹中高檔西餐廳遠多於日本餐廳,他就如此解釋:「我行誠品會特登去飲食嗰邊睇下,真係會有講食嘢History、講佢點嚟嘅書,但好少囉,反而講佢點整嘅就好多。我次次見到都即刻買咗返去先,第日如果咁啱食到呢個菜,就可以再研究返個Background。」

儘管Sawyer和女友每月只出四個Post,看來「工作量」並不沉重,但他卻透露每天總要為經營這個Page花上幾小時,不是吧?「要做資料搜集、睇書、寫文同執相,一張相我諗都要用Photoshop執25至30分鐘。」

圖為Sawyer首個IG Post的照片,攝於16年11月。Sawyer表示最初根本不懂得執相,相片看來一點都不吸引,難以呃Like,後來他慢慢上網睇教學改善Photoshop技巧。(受訪者提供)

我有落過Instagram廣告,但成效唔大,可能畀幾百蚊,佢換返嚟得幾十個Like,咁我畀咁多錢都冇乜用。

想不到每日最花時間的工序,原來就是不斷Follow其他人的Instagram,因為Sawyer拒絕買Like,覺得只有假Follower根本對經營社交平台一點幫助都冇,就連畀錢落廣告都放棄了,「我有落過Instagram廣告,但成效唔大,可能畀幾百蚊,換返嚟得幾十個Like,咁我畀咁多錢都冇用。所以我寧願Follow啲人,Catch咗佢個注意,睇下佢會唔會睇你個Page囉,因為我覺得香港人始終有少少冷感,好孤寒!你Follow佢,佢都未必會Follow返你!」

即使Instagram有數千人Follow,但整個IG平均每個Post的Like數為300幾至400百幾,最多人Like的一個Post,也只得603個Likes,再次證明香港人畀Like確實不鬆手!

根據Sawyer的統計,自己的讀者群主要為20至28歲的女生,因此他會積極地Follow這一類人,每天Follow幾百個,可惜通常只有20人願意反過來追蹤他,「至少係真嘅User先,同埋我哋有個習慣,見到廣告Page Follow我哋,都會Block咗佢,因為Followers好緊要,如果有日你個Page冇乜新Followers,冇人睇,即係個Page冇存在落去嘅價值,所以個增長其實都好緊要。」他直言兩年間不斷重複這個步驟——Like人,也渴望被Like,形容是「一步一腳印」,丁點都不敢怠慢,「真係好少會每日多過25個(Followers),但我覺得做依樣嘢係有Momentum喺度,如果你停咗,之後就算再開始返,可能每日都係5至7個,要冧返上每日十幾個,又要等幾個月,真係唔可以停!」

我淨係寫好食嘅嘢,因為一個月出四篇,仲要出時間寫篇唔好食嘅話,我嗰個禮拜啲Reader就搵唔到間靚嘅餐廳。

近年來網上一片對「飲食KOL」謾罵之聲,有Haters用盡火力攻擊某些Blogger收錢介紹劣食、賣廣告,有時甚至見到「打手死全家」等激進留言,不過槍打出頭鳥,自言「唔係好出名」的Sawyer暫未遭受過任何攻擊,但也曾有些不太善意的留言,Sawyer說:「有次我寫Duck Waffle,就話其實整Duck waffle都好麻煩,要有部Waffle機,煎鴨髀用一嚿嘢,跟住再炒啲Toppings放落去,有人留言話:『Wow,呢啲都要寫出嚟咩?』覺得我寫咁長好無聊,我冇嘢嘅,喺下面Explain返其實我唔會喺屋企開三個爐整一個Dish啫,跟住佢就冇Reply。」另外也有些網友視Sawyer為信心保證,特意私信叫他推介心水餐廳,「我哋好鍾意食Beef Tartare,佢會話『你介紹咁多間餐廳嘅Beef Tartare,覺得有邊間餐廳嘅Beef Tartare最好食呀?』」

網友經常不值Blogger一味將餐廳唱好,讓人感覺像鱔稿一樣,問到Sawyer會否都只將餐廳好的一面呈現人前,他說:「我淨係寫好食嘅嘢,因為一個月出四篇,仲要花時間寫篇唔好食嘅話,嗰個禮拜啲Reader就搵唔到間靚嘅餐廳,所以我喺餐廳篩選嗰方面都盡量揀下,同埋會避開新餐廳,想睇定啲評價先。」

Sawyer開宗明義向讀者表明自己已成為Eatigo賞味專員,但堅持不會為讚而讚,若Eatigo邀請他試食的餐廳並不符合專頁路線,他也不會勉強答應。

Sawyer透露朋友經常好奇他究竟何來有錢到處「食好西」,原來他一直都用折扣餐廳訂座平台Eatigo提供的半價或六折優惠,以實惠價享用美食,其貼文更曾被餐廳轉貼,於是他得悉Eatigo正招募賞味專員,便毛遂自薦加入成為其中一分子,不但能免費食返餐,出一個Post更有$500至$1,000酬勞,連同餐飲券等,每月更能賺取高達3萬元優惠!問到收入是否變得非常可觀,Sawyer淡淡然說:「其實唔會真係太介意個收入,我透過Food page賺咗錢,都係擺返落去個Food page度,再去返其他好餐廳食嘢,Share畀人。」

訪問當日,即場考考Sawyer點評訪問場地環境及食品,按圖即睇更多食品及其評價!

訪問當日,我們一行五人去到堅尼地城的Little Creatures用餐,當日不見他抄低任何筆記,最後卻得出一篇1200字食評!

+3
+2
要自己清楚個定位,話畀人聽我呢個Page同其他Page有咩唔同。有時餐廳邀請我食嘢,係咪所有餐廳我都要去呢?把尺其實喺自己度。

一牽涉到錢,總很容易令人覺得是賣廣告,被問會否因為收了錢便一味替餐廳隱惡揚善,他指自己篩選餐廳時都會下一番工夫,並非有邀請就會去,更強調:「要自己清楚個定位,話畀人聽我呢個Page同其他Page有咩唔同。有時餐廳邀請我食嘢,係咪所有餐廳我都要去呢?把尺其實喺自己度。咁點揀呢?你覺得你啲人喺度睇到你介紹咗呢間餐廳,會有咩感覺?會唔會同你本身出啲Post係格格不入呢?依個自己衡量返。」當講到萬一被他精選的餐廳最終水準平平,他會如何處理,Sawyer謂:「如果真係麻麻地,我會睇下佢全間餐廳係咪真係冇可取嘅位置,譬如環境、Service,因為我寫餐廳如果我知道嘅話,都會盡量寫多啲佢嘅Background,如果真係背後有故事,啲人知道個故事,佢去間餐廳,同普通Walk in入間餐廳個Experience又唔同。」

旁人看來,有免費餐食而且還有錢收,做賞味專員當然是筍工一份,然而Sawyer就表示自己要比以前更勤力,他說:「因為我1個月出4個Post,依家要Balance返,唔可以讀者睇親所有Post都係Eatigo餐廳,好唔Fair。我覺得可能要用雙倍Effort,譬如依家一個禮拜一個Post,遲啲可能一個禮拜兩個Post,溝返淡個比例,唔可以咁重,依個係我哋個Challenge。」



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。