的士司機新年化身財神爺!送金色朱古力 乘客:成程車好開心

撰文:桃樂斯
出版:更新:

農曆新年不少人都祈求「財神到」,寓意來年帶來財運。近日有港女於大埔搭乘的士時,就遇到財神爺「出巡」,事關該的士司機穿上財神爺服飾,更向每位上車乘客送上金色朱古力,她覺得既新鮮又驚喜,遂拍照分享到社交平台,大讚對方打扮「超逼真」,「呢個的士司機好有心機」。

有網民表示欣賞的士司機,「搭到一定好開心」、「香港多啲呢啲的士司機就好啦」。帖文更引來的士司機親自回覆,「多謝支持,希望下次都車到妳,我會努力諗下次有咩新搞作」,又笑稱「玉帝有旨,香港缺乏節日氣氛,命本財神分身下凡搞搞佢,而家揸的士試試水溫,香港會慢慢好起嚟」。

適逢農曆新年,有的士司機化身財神爺「出巡」載客。(threads影片截圖)

的士司機新年化身財神爺載客

該港女在threads帳號發文,上傳照片以及短片,大讚「呢個的士司機好有心機」。從帖文可見,該的士司機穿上財神爺服飾,頭戴財神頭帽,樓主形容對方打扮「超逼真」,她上車後更獲派金色包裝紙包裹的朱古力,車上又播放韓文歌,對此驚喜不已,大讚「打開車門嗰下真係眼前一亮,成程車即刻好開心」。

網民讚夠應節氣氛:搭到一定好開心

許多網民大讚的士司機裝扮夠應節,「咁正嘅」、「搭到一定好開心」、「香港多啲呢啲的士司機就好啦」、「如果佢日日都咁樣着,個個爭住上車」、「呢啲師父要畀多啲Tips(小費)」、「我頭先(喺)旺角都見到佢,以為拍廣告」。有人則表示曾有幸被「財神爺」接載,「我年初四都坐過佢車,一上車嗰時我都嚇親,我諗緊係咪要即刻落返車」。

的士司機親身回覆:會努力諗下次有咩新搞作

帖文引來該的士司機親自回覆,「多謝支持,希望下次都車到妳,我會努力諗下次有咩新搞作」、「大家見到開心,我又玩得開心,幾好呀」。有留言笑稱樓主「有運行」,「有運行囉,財神爺同你揸車」、「(天庭)落嚟兼職畀佢車到你,你有前途!」,司機則鬼馬表示,「玉帝有旨,香港缺乏節日氣氛,命本財神分身下凡搞搞佢,而家揸的士試試水溫,香港會慢慢好起嚟」。

點擊下方看更多「財神爺」的士司機照片

「財神爺」的士司機和乘客合照。(threads@d.j_taxi)
「財神爺」的士司機和乘客合照。(threads@d.j_taxi)
「財神爺」的士司機和乘客合照。(threads@d.j_taxi)

(threads@conniecps)