【生活百科】裝修佬教DIY洗冷氣機 一個人搞掂 成本唔使100蚊!

撰文:
最後更新日期:

文:裝修佬

冷氣機喺炎炎夏日為我哋帶來清涼,令我哋有舒適嘅環境,可謂係夏日神器。但長期使用冷氣機嘅朋友會發現,冷氣機喺運作一段時間之後,製冷效果就差咗,兼且仲有陣異味伴隨。如果長期係呢種環境中「嘆冷氣」,甚至會出現頭暈、乏力、感冒等症狀。其實,呢啲現象係冷氣機內部積塵、細菌隨住風飄向室內,令空氣細菌含量上升,空氣質素差咗,自然影響人體健康。睇到呢度,不妨打開你屋企部冷氣機嘅外殼,你就會發現有洗冷氣嘅必要。如果請師傅清洗,每部機費用差唔多成千蚊,而裝修佬今次教大家嘅方法成本唔使100蚊。以下就跟裝修佬學下清潔冷氣機,還自己清新空氣。

香港夏天極炎熱,幾乎家家戶戶都有冷氣機,但如何清洗卻考起用戶。(資料圖片)

下載「香港01」App ,即睇城中熱話:https://hk01.app.link/qIZYuEC5LO

【DIY洗冷氣機】首先截斷冷氣機電源,再打開外殼。(作者提供)

首先你要掹咗電源插座,以防發生漏電、觸電意外。然後將冷氣機外殼打開,(如果手開唔到可以用一字螺絲批輕輕撬開,小心唔好整爛外殼)。打開之後,輕輕向上推就可以將濾網拆落嚟,如果冷氣機位置太高抹唔到,外殼可以成個拆出嚟直接清洗。

【DIY洗冷氣機】之後用毛巾抹乾淨冷氣機附近,再貼上已經一分為二的垃圾袋,防止污水四濺。(作者提供)

將外殼同濾網拆走之後,再用乾淨濕毛巾抹冷氣機四周。然後你需要一個垃圾袋、透明膠紙。將垃圾袋一開二,透明膠紙黐係左右兩邊,預防等陣噴冷氣機清潔劑時污水滴到其他地方。

【DIY洗冷氣機】自行購買冷氣機專用的清潔劑,使用前要搖勻,再將清潔劑噴到蒸發器上面,其間要保持通風。(作者提供)

其實單單清洗外殼、濾網係唔夠架,最污漕係冷氣機內部嘅蒸發器,將專用嘅清潔劑(筆者喺超市購買嘅冷氣機清潔劑,盛惠58蚊)搖勻後均勻咁噴喺蒸發器上面,記得噴之前要開窗通風,然後靜置10分鐘。

【DIY洗冷氣機】如果冷氣機積塵太多,可以用刷將污垢刷走,但千萬不要放到太陽底下曬,以免受到高溫影響。(作者提供)

由於積塵情況實在太嚴重,自來水沖唔走濾網上嘅污垢,筆者用刷加上清潔劑刷先可以刷乾淨。清洗乾淨後,用乾布抹走上面水分,記得唔好攞去太陽底下曬,過濾網係膠製品,經唔起高溫。最後等其乾爽後裝返原先位置便可。 

裝修佬建議巿民每年洗冷氣機2次。(資料圖片)

洗冷氣小貼士!

每年洗冷氣機最少2次,係夏天用前及秋天時清洗,以達到殺菌、消毒、去除微生物滋生、消滅細菌根源,延長冷氣機使用壽命,尤其係濾網,濾網可以起到過濾粉塵、病菌同有害氣體。最好每日可以開窗令室內空氣流通,避免室內潮濕環境滋生細菌。

作者簡介:

裝修佬是家居裝修奇難雜症專家,希望透過文章分享及網上互動,解答巿民各式裝修難題,改變大眾對裝修方式和置家理念。

作者facebook專頁:https://www.facebook.com/hkdecoman/

(文章標題由《香港01》編輯所擬。文章純屬作者意見,不代表《香港01》立場。)

立刻Like!讚好《01熱話》:


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。