在公眾地方要顧及自身行為，以免惹人討厭！有家品店收銀員投稿到專頁分享，稱有中年婦人在店內購買指甲鉗，對方付款後直接在現場拆開包裝剪指甲，店員有禮出言制止卻被對方質疑，「喺你舖頭買，點解唔可以喺你舖頭用呀？」在旁大叔看不過眼，便反問對方1句話，令婦人即時敗走。

網民們都大讚大叔的比喻「精準獨到」，「真係要啲客用魔法，先打得敗呢啲西客」、「聽到的話真係會笑到收唔到聲」，亦有留言指責婦人無品，「真係面斥不雅」、「究竟有幾緊急要即刻剪」。

婦人買指甲鉗「即場剪指甲」　店員試圖制止不果

有任職連鎖家品店的網民投稿至Threads專頁「officedailyhk（辦公室日報）」，分享日前遇到1名中年女士到店內購買指甲鉗，對方付款後在收銀櫃檯前直接拆開包裝，並即場剪指甲，樓主見狀好言相勸，「小姐，你唔好喺度剪指甲呀！」詎料女子反指既然指甲鉗是在店內購買，「點解唔可以喺你舖頭用呀？」又強調「我畀咗錢㗎喎！」

大叔客反問1句　婦人被KO秒敗走

樓主當時不知如何應對，同場有大叔看不過眼，指旁邊便利店都有售賣避孕套，反問該女子「你畀完錢唔喺7-11直接X嘢？」婦人無言以對只好敗走，樓主則感激大叔出手幫忙，「好多謝阿叔幫我擊退咗個女人」。

網民讚大叔比喻完美：魔法打敗魔法

不少網民讚揚大叔「轉數快」，「個比喻真係完美」、「功力深厚，精準寸到重點」、「阿叔大獲全勝」、「真係要啲客用魔法，先打得敗呢啲西客」、「無恥嘅人係要阿叔呢啲人先搞得掂」、「店員提佢隨時俾人投訴，旁人出聲X佢就啱㗎啦」、「聽到的話真係會笑到收唔到聲」。

婦人捱轟缺德：真係面斥不雅

另有人就批評婦人行為缺德，「喺公眾地方剪指甲嘅人真係比老鼠曱甴更恐怖」、「究竟有幾緊急要即刻剪」、「唔知有啲咩嘢唔適合大庭廣眾做嘅咩？」、「真係面斥不雅」、「付費購物代表物件所屬權轉移，在哪裏使用是另一件事，店舖有權拒絕」，亦有網民笑稱「你問佢買姨媽巾係咪即場喺舖頭用？」、「喺萬寧買沐浴露，會唔會當眾沖涼？」。

（Threads＠officedailyhk）