分手要狠，比相戀勇敢！本港有1名女生在網上慨嘆，和男友拍拖8年，本身去到談婚論嫁階段，無奈無法再忍受男友，明明對方月入大約4萬元，不但為人吝嗇，「永遠出街食飯都AA制」，而且「1蚊都冇使過喺我身上」，她只求生日有份禮物，明言即使是「拎張紙畫幅畫」都可以，但男友都沒有做到。

港女希望男友求婚，「2個人靜靜地坐喺屋企問我願唔願意嫁畀你」都可以，但男友一樣拒絕，同時拒絕給予禮金，明言「唔係拎咗你阿爸阿媽啲咩」，令到女方父母大感心痛，認為「自己個女點解要被呢啲人蝦」，如今她31歲，「冇信心同勇氣再繼續行落去」，決定分手，「真係好痛，好驚自己行唔到出嚟」。

大量網民立即安慰「有福之女不入無福之門」、「結婚前諗清楚一律當喜事啦，結咗婚只會仲差，到時要離婚仲煩」、「分得好，支持你，佢根本唔係愛你，只係習慣你存在」。

樓主非貪圖物質　男友拒絕為她花費

樓主在threads表示，目前31歲，和男友交往8年，明明去到談婚論嫁，但「最近終於扚起心肝行前一步，講分手」，如果男友經濟能力欠佳，樓主願意「一齊捱」，但男友月入大約4萬元，卻為人吝嗇，「永遠出街食飯都AA制，今餐你畀完，下餐一定要係我畀」。她又不滿男友「1蚊都冇使過喺我身上」，自己並非貪圖物質，男友可以在其生日「拎張紙畫幅畫」送給她，樓主已經感到開心，「我講到出口，你都冇做到」。

男友拒絕求婚　認為雙方已有共識結婚

結婚方面，樓主多次提及希望男友求婚，「唔係要當住咁多人面前同我求婚，亦都唔需要任何儀式，可以2個人靜靜地坐喺屋企問我願唔願意嫁畀你」，但男友每次回答「唔需要」、「大家有共識結婚，求婚嘥氣」，覺得完全不需要買求婚戒指給她。

男友拒付禮金︰唔係拎咗你阿爸阿媽啲咩

至於禮金，男友更稱「1蚊都唔需要畀，𠵱家唔係拎咗你阿爸阿媽啲咩」。樓主無索向父母轉述，父母聞言心痛，認為「自己個女點解要被呢啲人蝦」，覺得對方不值得付託終身。

樓主決定分手︰喊咗無數次

樓主自言「喊咗無數次」、「曾經都呃自己，呢啲嘢根本都唔重要」，但每次聽到或見到身邊朋友結婚過程都非常開心。樓主不停自問「係咪做錯啲乜嘢？定係我有啲咩唔好？所以我值得咁樣嘅待遇？」，向親友訴苦，最後決定分手，「冇信心同勇氣再繼續行落去」、「但係分手真係好痛，好驚自己行唔到出嚟」。

網民︰呢種唔係慳，係情感殘疾

許多網民留言安慰樓主，「我覺得對方是真的不愛你，已經宣之於口」、「任何要AA嘅男人都要即飛」、「31歲好年輕之嘛」、「真心恭喜你」、「男人搵4萬蚊，連生日畫張紙都話唔需要，呢種唔係慳，係情感殘疾」。

（threads@iwanttosayhiiii）