方力申渡海泳至澳門|網民列改觀4件事:以前寸到無倫,現感佩服

撰文:程譽恩
出版:更新:

藝人方力申昨日(11月21日)挑戰由香港渡海泳至澳門,全長35公里,最終以8小時37分24秒完成,打破前人歷年紀錄,獲得健力士世界紀錄認可,並成功籌得1,000萬善款,支持基層及有特殊教育需要(SEN)兒童參與體育培訓。方力申的善舉與毅力引來facebook網民盛讚,發文分享對方力申徹底改觀的4件事,不少網民認同方力申年輕時態度「寸寸貢」,但現時認為「佢唔係無料扮四條,有料自然寸得起」、「以前我都叫佢万刀甲,因為呢件事我以後叫返佢方力申」、「以前對佢印象麻麻,現在改觀了,起碼唔係X噏,真係做實事」。

不少網民紛紛表達敬佩之情,「當你浸喺波濤洶湧鹹水度8個鐘嗰啲滋味,唔好叫你游,已經好犀利,好嘢,佩服佩服」、「為咗慈善搵條命嚟博,冇得頂」、「用實力說話」、「咁嘅年紀要有咁嘅體力真係好難!」、「香港人之光」、「好極致的勇氣毅力,秒秒都是危險搏鬥」、「我平時很少捐款,今次會捐款支持一下!但勸籲小方不可再作高風險籌款活動,再有下次,佢企出嚟呼籲,我就願捐款!今次當10次!」。

由凝動香港體育基金主辦的「方力申港澳慈善游2026」11月21日9時起步,方力申由香港大嶼山最西面的雞翼角出發,橫渡珠江口游往澳門黑沙海灘,全長35公里,為有特殊需要的小朋友籌款。(大會提供)
「方力申港澳慈善游2026」11月21日舉行,圖為方力申在雞翼角正式下水前的拍照留念。(大會圖片)
「方力申港澳慈善游2026」11月21日舉行,圖為方力申準備在雞翼角下水。(大會圖片)

由凝動香港體育基金主辦的「方力申港澳慈善游2026」11月21日舉行,方力申在大澳上船出發往大嶼山最西面的雞翼角,其後早上9時下水橫渡珠江口游往澳門黑沙海灘,全長35公里。

方力申35公里渡海泳至澳門

有網民於facebook群組「香港即時突發事件討論區」發文表達近年對方力申改觀的感受,指出「以前睇過方力申嘅訪問,覺得佢寸到無倫,成日講自己當年個香港紀錄10幾年都無人破到,乜乜XX」。

「方力申港澳慈善游2026」11月21日舉行,圖為方力申在茫茫大海中游泳。(大會圖片)
「方力申港澳慈善游2026」11月21日舉行,圖為方力申正橫渡珠江口。(大會圖片)
「方力申港澳慈善游2026」11月21日舉行,圖為方力申正橫渡珠江口。(大會圖片)

樓主對方力申徹底改觀的4件事

1. 佢開游水學校,為咗個學生單挑泳總(編按:曾多次公開發聲,質疑香港游泳總會的屬會分級、計分及參賽資格制度)

2. 40幾歲學人參加世界游泳比賽,贏咗個金牌(編按:2025年新加坡世界先進游泳錦標賽45-49歲組別贏得3面金牌)

3. 上次游環島泳(編按:2019年香港島45公里慈善環島泳)

4. 今次仲學人游水去澳門,35公里,全程8.5小時,全程直播

「方力申港澳慈善游2026」11月21日舉行,圖為方力申衝線前的一刻。(大會圖片)
「方力申港澳慈善游2026」11月21日舉行,圖為方力申衝線前的一刻。(大會圖片)
「方力申港澳慈善游2026」11月21日舉行,圖為方力申衝線前的一刻。(大會圖片)

樓主:又凍又大浪,真心搵命博

樓主指出,方力申「唔係為自己,係做慈善,係為有需要嘅細路籌錢」,佩服道「又凍又大浪,真心搵命博」。

樓主認為,「方力申嘅創舉已經寫入史冊,前無古人後無來者」,他又擔心方力申身體,「老老實實真係唔好再咁樣游,下次去泳池好無?」。

「方力申港澳慈善游2026」11月21日舉行,方力申在下午5時半到達終點,以8小時37分24秒完成,不但較預期快約20分鐘,更打破歷年紀錄。(大會圖片)
「方力申港澳慈善游2026」11月21日舉行,方力申在下午5時半到達終點,以8小時37分24秒完成,不但較預期快約20分鐘,更打破歷年紀錄。(大會圖片)

網民:為慈善而游,值得敬佩!

「行8個鐘都有難度,游8個鐘真心佩服」

「淨係浸喺水度8個鐘,唔使你郁都辛苦,唔好話要游8個鐘」

「真心,咁游過去,真係差啲命都無,8.5鐘你叫1個人正常行山無得坐低休息都死」

「喺個海度游成8粒幾鐘,中間仲要有好多未知數,冇人會知發生咩事,真心搵命搏」

「為慈善而游,值得敬佩!而且,係游足近9個鐘,46歲,唔係講笑!會死人!十分抵讚!而且當晚上水立即出席澳門百老匯慈善演唱會,香港,甚至全世界,冇乜人做得到!仲要入埋健力士,最快個人游香港至澳門!小方,勁揪!」

方力申以8小時37分24秒破紀錄游到達澳門黑沙海灘後,仍有餘力向鏡頭擺出「鬼馬」姿勢。(凝動香港體育基金YouTube截圖)

網民:方力申游水係寸得起

「佢唔係無料扮四條,有料自然串得起,話人無出頭嗰啲,說穿就係葡萄,方力申已用行動證明」

「方力申游水係串得起,佢真人幾斯文,喺大學時對同學與師長都好有禮貌,唔錯嘅1個人」

「咁佢個紀錄確實20幾年後先有人破,佢背後付出咗幾多努力,我又唔覺得寸喎」

「佢啲香港紀錄又真係好多年冇人破到,雖然而家已經俾人破晒,但保持咁耐都係好難得呢個係事實!你都係擔心佢玩大咗有危險啫!放心喎!佢仔細老婆嫩應該識諗!」

「由佢一次訪問講過:小朋友來學游水,家長話要教到小朋友可以贏,但方力申話我係教佢輸,因為比賽只有1個人贏而大部份人都係會輸,所以要學識點解會輸,日後至有機會贏。聽完呢番話我就覺得佢係與眾不同,而且仲係有料嗰隻!」

「方力申港澳慈善游2026」11月21日舉行,方力申在下午5時半到達終點。圖為上水後與家人合照。(大會圖片)

網民感方力申現時為人更踏實:結婚生仔後有改變

「其實佢好代表80後嘅香港人,年青梗係寸寸貢,不可一世。但隨着年紀大咗,人生經歷多咗,做事都成熟咗。佢同好多香港人一樣,都係樂於助人、關心社會、有慈善幫人嘅心,呢個係土生土長香港人嘅傳承」

「以後唔叫佢万刀甲了,佢真係好勁,40幾歲為依個社區做實事,仲挑戰到世界紀錄,方力申真係唔簡單!」

「至少結咗婚生咗仔嘅佢,成個人都改變咗,以前覺得佢嬉皮笑臉,而家做好多嘢都係為公益,而且佢又係1個好愛錫家庭嘅人,都戥佢好開心」

「我感覺佢踏實咗,同好家庭為先,真男人」

「以前係『假㗎啲奶』(編按:無綫電視(TVB)節目《美女廚房》中的經典金句),而家係『堅㗎方力申』」

(facebook群組「香港即時突發事件討論區」)