輕鐵男狂撩獨坐小妹妹 坐隔籬仲咁做 熱心街坊解救:我都震震哋

撰文:李納德
出版:更新:

寧願多事好過真的有事發生!有屯門街坊發文,指日前坐輕鐵時明明「好吉」,但有名陌生男卻不停撩1個獨自坐車的小妹妹聊天,更突然拿出飲品請小妹妹喝,乘機坐到小妹妹旁邊。「請飲嘢」舉動令街坊意識到有危險,即鼓起勇氣去拍陌生男膊頭,示意自己和小妹妹是一起的,「個刻我都震震哋,始終個陣架車無乜人」,幸好陌生男見狀就回到自己本來座位。該街坊自問可能只是太多事,陌生男未必有不軌企圖,惟帖文被網民讚爆,認為她「救咗妹妹」,呼籲街坊們寧願被人說「多事」也應該適時發聲。

街坊日前在屯門馬頭坐輕鐵,發現有陌生男子不停找小妹妹聊天。(示意圖/資料圖片)

樓主在facebook群組「真‧屯門友」分享緊張經歷,昨(5日)在屯門碼頭坐輕鐵,上車後「勁吉,超多位坐」,見到有個男人坐單丁位,另1名小妹妹獨自坐在兩人座,她就坐到男人後面的單丁位。她說「男人無啦啦撩個小妹妹講嘢」,突然問小妹妹考試之類的事情,小妹妹有回答,但「講講下嘢,男人話畀支嘢飲小妹妹」。小妹妹醒目即時拒絕,但該男子「跟手坐埋去小妹妹隔籬,然後個男人仲要講,『一陣會好多人,我坐埋過嚟同你坐』」。

樓主心知不妙,「我覺得件事好似會危險喇」,她鼓起勇氣起身,過去拍該男子膊頭,示意她是和妹妹一起坐車的,「嗰刻我都震震哋,始終嗰陣架車無乜人,仲要尾卡,車長都未必發生咩事」。幸好男人自行坐回原本的單丁位,她即問小妹妹是否認識該男子,「妹妹話唔識,我就叫佢,你自己要小心,唔好畀佢坐隔籬」。

樓主指,車廂內由頭到尾都超多空位,陌生男本身有位坐,無必要坐去妹妹旁邊,「仲要三唔識七無啦啦送支飲嘢畀妹妹」。她由頭到尾目擊事件,擔心陌生男坐過去後,待其他人陸續上車時,會以為兩人同行,「仲要坐咗(尾卡)車頭,發生咩事,其他人根本見唔到」。她承認自己沒明確證據,證明陌生男圖謀不軌,「我寧願自己厚多士,都總好過有不愉快事件發生」、「大家真係要多多留意身邊人與物,可能大家覺得我厚多士咗,香港而家真係要萬事小心」。

街坊擔心在車上沒什麼人,又要在尾卡,有事起來車長都未必知,故急着幫忙。(示意圖/資料圖片)

帖文吸引逾2000人讚好,許多網民認為陌生男可疑,提醒附近時有「猥瑣佬」出沒,樓主可能救了該妹妹,「好欣賞你嘅勇氣,好人一世平安」、「多謝樓主拔刀相助」、「妹妹好彩預到你」。樓主則回應指,自己的分享只是希望多些小朋友有危險意識。

有網民提到,現時很多小學生都是自己放學,「我接小朋友放學時見到,小三咁大都係冇家長接送」,而該男子「請飲嘢」太過可疑。見樓主不斷提到可能是自己多事,有人力撐「你唔多事吖,你仲救咗個妹妹添」、「寧願你俾人話多事無數次,都唔好俾呢啲機會發生一次,好人一世平安」。

(facebook群組「真‧屯門友」)