人情味小店　八十後5元兩大球雪糕益街坊　西九龍中心突不續租

綠茶、豆腐、芒果、曲奇……每球如拳頭般大的雪糕，每兩球只售5元？深水埗一間小小的雪糕店，店主為了讓基層學生及長者大快朵頤，以平價出售大大球雪糕。可惜小店本月中被告知檔口不再獲續租，將於母親節當日結業。

八十後、任職文員的Calvin去年在深水埗西九龍中心租用一個輪車檔賣雪糕，每日與母親「拍住上」，放工後便趕緊到雪糕店工作。為何選擇開設雪糕店？Calvin認為雪糕可賦予人們正能量，「食完個雪糕力量就返哂嚟喇！」

決定在深水埗開店，亦是Calvin的情意結。兒時居於深水埗，家貧，「如果求爸爸媽媽買雪糕，屋企夜晚餐餸就會少咗一截㗎喇！」加上Calvin兒時病痛多，故食雪糕的經驗亦少，長大後便決定返回升中學前成長的深水埗，平賣「拳頭雪糕」。

5元兩球街坊價　雪糕球大如拳頭

記者目測每球雪糕如拳頭般大，只賣5元兩球；想「食豪啲」，10元可買四大球，份量多得連紙杯都幾乎裝不下，學生哥捧著滿滿的四球雪糕，笑逐顏開。為何球球雪糕都要弄到拳頭般大？Calvin指「一開始好隨意嘅，『筆』落去唔好睇，咪『筆』多少少囉！」

最終每球雪糕均如拳頭般大，有顧客曾要求雪糕球可稍稍縮少，亦有顧客認為雪糕值更高價，付錢時放下20元甚至100元，但最終均被Calvin打回頭。「我哋個宗旨就係，無論有錢或者無錢都好，五蚊，都可以食到好大球、亦好平嘅雪糕」。

我哋個宗旨就係，無論有錢或者無錢都好，五蚊，都可以食到好大球、亦好平嘅雪糕

曾被投訴雪糕球太大

不過Calvin亦指，雪糕供應商向他指，有來自不同區域的雪糕店行家投訴Calvin售賣的雪糕每球太大，亦曾派員到場了解。對於西九龍中心內亦有其他雪糕店，平價出售超大雪糕球，豈不是「頂爛市」？Calvin認為有其他雪糕店訂價$10四球，「我哋（$5兩球）都係兩球起啫，價錢都係一樣」。位於同一樓層的另一間雪糕店店主黃先生接受《香港01》查詢時指「我都唔知佢畀人逼遷」，他又指自己並非使用同一雪糕供應商，「佢得十隻味，我有36款味」，強調自己與Calvin的雪糕店客路不同，「做生意各有各做啦！」

Calvin不諱言深水埗區低下階層較多，「小朋友同老人家生活質素環境質素爭啲，因為自己住過」，故現時「叫做可以回饋下社會，幫下社區服務咁樣囉」。身為八十後，Calvin指服務社區亦要把握機會，「今日唔做，幾時去做呢？我同自己講，起碼有做過，我都無遺憾」。

母子檔拍住上

經營小店一腳踢，Calvin最感激的是他任清潔工的媽媽，每日放工後到西九龍開店。媽媽年紀老邁，弓著身子盛雪糕，一下一下的將桶內雪糕挖成大雪糕球，準備一個兩球雪糕、加上朱古力醬及脆針，需時近五分鐘。Calvin笑言「我最多謝就係我媽媽，由細到大媽媽都好錫我」。

協助兒子開雪糕店累嗎？「做咩工都攰㗎啦！」黃媽媽說。「我日日過嚟開檔㗎，你日日都見我㗎喇！」記者笑言她是「廿四孝媽媽」，黃媽媽則指「個個父母都係咁㗎啦！你呀媽都係咁㗎啦！」

最初黃媽媽對雪糕種類一竅不通，「人哋叫我筆雪糕我都筆到亂哂籠，哈哈！」雪糕店開業近一年，黃媽媽亦已變得對雪糕口味暸如指掌。黃媽媽賣雪糕、也愛雪糕，「我晚晚都食㗎！」看見一眾顧客接過雪糕後表現出開心表情，黃媽媽亦感到高興，「佢食得開心我都開心！」

業主突派信稱不再續租

不過好景不常，Calvin上月突然收到租務處的信件，指租用的輪車檔不獲續租，「復活節嗰日，就搵個保安畀封信我媽媽，咁就算喇，就無解釋任何原因」。信件內指，輪車許可證將於5月14日屆滿，雪糕店需於5月15日下午6時之前清場及交還位置予管理處。

日前（4月25日）facebook專頁「名校Secret」收到網民投稿，指雪糕店不獲續租而即將結業，僅三日便有逾3,800在帖文表達「喊」或「嬲嬲」，不少網民亦紛紛留言，指「婆婆好好人」、稱讚「他們卻能得到別人的尊重」；亦有網民稱「5月14就冇得買啦，你地快啲去食啦！」

立會議員介入求情

立法會議員梁耀忠亦有出手協助Calvin，負責處理此求助的議員助理鄧先生回覆《香港01》時指，他曾先後兩次致電西九龍中心，表明「有啲事想幫街坊求情」，第一次鄧先生詢問職員「經理貴姓」後，職員稱不便透露，「之後就cut咗我線」。至第二次致電西九龍中心，對方亦只著鄧先生留下聯絡方法，但至今仍未獲西九龍中心回覆。

雪糕店開業不足一年便要結業，Calvin指數個月前已開始與西九龍中心商討續租問題，但一直未獲明確答覆，直至本月收到不獲續租通知，Calvin亦無再與租務部干涉，「都費事抓爛塊面」。

對於黃媽媽來說，雪糕店要結業盡是不捨，「梗係唔捨得㗎啦，做咗成年有感情喺度㗎嘛！」至於Calvin，會否在其他區份重開雪糕店仍是未知之數，現時只能慨嘆「唯一最遺憾就係，佢哋（居民）少咗個地方、食唔到咁大球同埋咁平嘅雪糕」。

《香港01》就此曾兩次致電、發電郵及在西九龍中心facebook專頁發訊查詢，但截稿前仍未獲回覆。早前有傳媒報道，裕景興業持有西九龍中心項目，而裕景興業亦被《明報》揭發將山頂加列山道「龍庭」3幢獨立屋「一劏四」，12個1,200至1,500平方呎單位出租，連車位月租6萬元。