葵涌小店廿年不變 煎釀三寶一蚊一件 老闆:搵份人工得啦

最後更新日期:

對於變化,香港人見慣不怪,一旦看到不變的事物,反倒覺得詫異,例如葵涌一間小店,「一蚊一件」煎釀三寶二十年不變,與升完又升樓價,形成強烈對比,令人詫異。

老闆娘日做12小時,一個月僅休息兩天。(周詠雯攝)

下班時間來到葵涌光輝圍,從老遠看到熙來攘往的路上,排了一條長長人龍,走近一點,榮泰小食店老闆娘正叫賣「一蚊一件煎釀三寶」、「雞翼十蚊五隻」,客人都是廿件、三十件,一盒盒的買。密密做、無停手,老闆娘客氣詢問每個街坊要不要翻熱食物。

放工時間榮泰小食店堆滿食客。(周詠雯攝)

【小店有情】滷味店遭甩底兼呃錢 千七元雞鵝免費贈街坊

葵涌廣場雪糕店十多年堅守12元5球 棉花糖造就無數年輕情侶

榮泰小食店開業二十年,小店所在的唐樓珠寶大樓,當年單位售約50至70萬元,今年已升價至200萬。記者還記得麥當勞脆香雞翼,從前5元兩隻,今天要約9元。老闆歐陽先生和太太96年「頂手」小食店時,煎釀三寶當時已售一蚊一件,今天依舊,沒有加價,沒有賺盡,夫妻每天辛勤工作,養大女兒和兩個兒子,一家人亦由安置區搬上公屋、再換居屋。

老闆:啲伙記有錢有糧出咁就得啦

「初初成本無咁高,到宜家成本高咗,但街坊買開又唔捨得加價,個個食慣咗,賺少咗就一定係㗎喇,不過做得好開心囉,見到啲客食到舐舐脷就好開心。」老闆娘邊說邊笑,加上業主不怎麼加租,所以還能維持下去。一頭白髮的老闆附和着說:「佢(老闆娘)話事囉,我無所謂,搵份人工得啦,啲伙記有錢有糧出咁就得啦。求求其其,搵返幾皮咁啦,哈哈哈哈哈。」

有人擔心食肆會翻用食油,尤其是用油量的炸物,不過老闆娘就稱,炸煎釀三寶不能不換油,「日日換油架,成煲換晒,一唔換隔日啲油就炸到黑色、有油渣,所以日日都洗爐」。

說到一蚊一件煎釀三寶賺不到錢,老板笑說:「求求其其,搵返幾皮咁啦!」(周詠雯攝)

開足24小時 一個月休兩日

年過半百的老闆娘,子女都已經投身社會,理應可以過半退休的生活,不過榮泰至今仍24小時營業,一個月僅休息兩日。老闆和老闆娘,每日仍親自落到店舖分別負責廚房和樓面,日做至少12小時。「啲仔都有叫我唔好做,不過又唔識打麻雀,又無定去,無乜細藝,即係自己身體就負荷得到,咁就做落去睇下點先!」除了無事好做,街坊情也是讓老闆娘堅持日日開舖,「啲小朋友細細個到而家大個,一嚟到就攬手攬腳,『靚媽去咗邊呀?』」

訪問期間,不少街坊見到相機,都笑說「嘩,老闆娘上鏡!」、「做訪問喎!」,又有街坊見老闆娘正在訪問,索性自己招呼自己夾三寶,或者徒手就拿起三寶吃掉。

一蚊一件的煎釀三寶款式甚多。(周詠雯攝)

性格一凹一凸 拍檔二十年

現代夫婦僅下班後才見面已覺得生厭,老闆和老闆娘就算開工都看到對方,會不會更厭?不說話時兇神惡煞、一開口就笑的老闆這樣說:「日日見到佢仲厭添喎,哈哈哈哈,成日鬧交,成日打架添呀!兩個都打,佢打我、我打佢咁囉!」老闆娘的版本則如下:「佢脾氣非常好,佢好淡定,我就心急,我成日一無野賣就好緊張催佢快啲炸,你話乜野佢都唔會出聲,咁先堅持到宜家、做得咁耐囉!」

老闆和老闆娘共同經營小店已經超過20年。(周詠雯攝)



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。