張敬軒「降兩度」6月開紅館騷 大家最想聽佢唱邊首金曲?

撰文:
最後更新日期:

6月有得聽張敬軒,吖唔係,係「降兩度」嘅Live喇!

張敬軒今日喺instagram貼出一張紅隧口廣告相,為樂迷帶來好消息,就係落實《張敬軒HINSIDEOUT 演唱會》於6月15日至17日舉行。相信今次軒仔將會以大家最期待的「女」新人「降兩度」身份登場,因為海報寫有「GONLANDO」即降兩度的英文諧音;再加上演唱會中文名稱為《張敬軒♭♭演唱會》,留意番唔係「張敬軒bb」,而係降號嚟,咁就直情畫出腸俾大家知「降兩度」會現身啦。

降兩度開騷呢個post出咗十幾分鐘已經有三千幾人like喇!(張敬軒instagram圖片)

張敬軒「降兩度」呢個名點嚟,相信大家都略有所聞,你唔知都唔緊要,依家就話你知。事源facebook紅人「瓊姐」兩年前出post,發現只要將女歌手嘅歌降兩度,把聲就會變成張敬軒。例如:容祖兒的《爭氣》、盧巧音的《落地開花》及《三角誌》、吳雨霏的《愛是最大權利》、梁詠琪的《灰姑娘》等等都是「成功」之作。

當時此post一出引來極大迴響,更令軒仔「找數」推出meldey,而且亦有開Live唱晒女聲歌,事隔差不多兩年終於等到「降兩度」開Live,各位樂迷又係時候準備撲飛喇!

大家Loop住呢條片先啦,好快就等到「降兩度」嘅Live㗎喇!


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。