張敬軒「火燒頭髮」玩咁大? 工作人員當係爐頭燒嘢食

撰文:黃浩晉
出版:更新:

張敬軒「降兩度」終於確認6月開紅館騷,日前喺紅隧口嘅poster一出已經令樂迷為之瘋狂。不過,軒仔比大家更瘋狂,佢為咗影poster連「火燒頭髮」都玩埋,所以大家睇到poster上面嘅火唔係CG,係真火嚟㗎。

張敬軒為咗影紅館騷poster,連火燒頭髮都玩埋!

今日軒仔喺instagram貼出「製作花絮」,團隊邀請到印度「火燒理髮」師傅出手,眼見師傅用梳將軒仔啲頭髮兜嚟兜去,加埋熊熊烈火真係好似炒緊餸。工作人員亦「好有人性」攞埋燒烤叉,喺軒仔個頭上面燒嘢食,仲唔小心滴咗滴油落軒仔塊面。玩到咁大軒仔都忍唔住話:「我一路以為自己呢個係人頭,但原來我呢個係爐頭!Cult到爆呀呢件事!」

到底軒仔當時係咩心情呢?

雖然海報出街效果好玩,但拍攝期間都唔係易過。當日氣溫得7度,軒仔要半裸上身影相,但頭頂就燒到「㷫烚烚」,真係特別的「冰火」體驗。話說回來,「火燒理髮」經過專業訓練,大家切勿模仿。而且「火燒理髮」唔單止係gimmick,其實係個treatment,軒仔都話頭髮順滑咗:「真係『令』咗同埋滑咗!我本身有少少乾旱嘅頭髮,做完呢個treatment之後全部都冇晒!」