【音匠相傳】吳浩康唱功「急救班」　兩招令你脫胎換骨！

吳浩康（Deep）早前為《音匠相傳》音樂會拍攝海報，既然音樂會主題是「傳承」，Deep藉此與樂迷分享一些歌唱技巧與心得，各位「唱歌精」係時候學嘢喇！

音準、拍子、感情？　點練先得？

相信大家都聽過，唱歌要兼顧「音準、拍子、感情」，Deep身為歌手兼歌唱導師，逐一解釋這三件事：「感情冇得學、冇得教，要慢慢感受，但係唔好好似朗誦表情好造作咁去唱。」

「另外兩樣嘢係有得學，有得練，搞掂咗拍子、音準已經有6、7成好聽，所以大家去練歌一定要留意拍子，因為係影響住呼吸節奏。」

Deep又舉新歌《那怕最終一個人》作例子，他表示要「夠力」同「跌下巴」。他說：「呢首歌情緒係漸進式激動，唔難去理解點演繹，即使聽眾亦唔難理解。」

到「夠力」這個部份，雖然Deep笑說這是「廢話」，但這的確是不爭的事實：「要唱好佢真係要『夠力』，雖然係廢話，其他歌你唔夠力最多係唔好聽，但呢隻歌唔夠力係完全唱唔到。尤其『算吧 回去吧 忘記吧』呢句，每一段都攞緊我命！」而「跌下巴」是要你盡量打開口腔的空間，才能讓發音、咬字、音色變得紮實和飽滿。

再者，《那怕最終一個人》的分句也做了些小心思，Deep說：「『想愛就愛吧』如果每段都食個正拍，咁平均會有啲悶，所以第三段拍子有啲唔同，令首歌有啲起伏。」

唔好睇小「數拍子」　做得唔好隨時破壞成首歌！

Deep提到做好拍子與音準，唱歌已經有6、7成好聽，原來單單是拍子這一環已經分出高下。他說：「好多時大家唱歌，每一句中間要等好耐，『監粗』拿拿聲唱下一句；其實首歌唔係咁，唔應該係咁，你應該應該一路數住，聽眾先消化到，歌手亦可以處理到，所以離不開用拍子機練嘢。」Deep又舉玉置浩二清唱《Mr. Lonely》作例子，簡直是歌手的教科書，各位「唱歌精」不妨偷下師。

即刻睇玉置浩二神級示範！

演唱會有女版《洗剪吹》？

談到《音匠相傳》音樂會，Deep形容當晚會是「唱家班的晚上」，亦相信會吸引一眾「唱歌精」入場。Deep又表示，希望當晚能有一個女版或合唱版的《洗剪吹》：「你諗下泳兒唱《洗剪吹》幾正呀！如果佢唱《洗剪吹》，我唱《感應》！」除此以外，Deep還吸收了以往開直播的經驗，精選了一個歌單，希望一次過滿足不同樂味的口味。

緊貼【01眾樂迷】Facebook專頁，請按此