叱咤五強最後階段各出奇招拉票　林二汶未攞獎先找數絕密造型曝光

每年樂壇盛事之一的「叱咤樂壇頒獎典禮」五強投票進入第二階段，入圍「我最喜愛的女歌手」五強名單為方皓玟（小明）、林二汶（Eman）、容祖兒（Joey）、鄭秀文（Sammy）及謝安琪（Kay），至12月6日中午12時便截止此階段投票，想心愛的歌手得獎便記得投下一票！各位歌手都各出奇謀為自己拉票，而二汶則與樂迷分享晉身五強的喜悅：「依家未攞獎先找數！」在今晚11時半在Facebook及Instagram開Live和樂迷淺談心事：「我陪吓你你陪吓我咁啦，人生嘅嘢，最緊要係咁。」

隨帖附送的除了一個能與偶像交流的機會外，二汶攪鬼地上載了一張「長髮造型」配圖，更加上抵死標籤「#人一世物一世」、「#多謝各位」、「#如果我長髮咁樣你仲投唔投我」，而樂迷們立刻與她割蓆：「如果咁嘅樣應該唔會投，明明我唔係顏飯（外貌協會的樂迷）」、「如果長髮個樣我會想同你打交再考慮割蓆…」，亦有樂迷表示「長髮造型」的二汶既似梅小慧，又似陳妙瑛！