【專訪】黎曉陽神隱兩年出EP 盧凱彤遺作《黑鏡》面世終鬆一口氣

撰文:
最後更新日期:

一身文青打扮,坐在海濱草地上自彈自唱,黎曉陽(Michael)在別人眼中一直是個自由自在、隨遇而安的人。他用兩年時間製作最新EP《Before I Forget》,將期間的心路歷程輯錄成碟。背後的故事要追溯到2017年末推出上一張EP後的空窗期,而該段經歷或會令大家更了解Michael不為人知的一面。

攝影:梁碧玲

見黎曉陽推出EP《Before I Forget》,大家心裡都會有一個疑問:「究竟Michael這兩年去了哪兒?」相隔兩年再出EP,Michael表示匣那兩年陷入迷惘期,完全找不到新的創作方向及靈感。而且,期間開始接觸其他創作人的作品,當時收到第一首歌正是盧凱彤(Ellen)所寫的《黑鏡》。作品談及生死這個沉重的題材,而Michael當時亦受心事困擾,雖然梁柏堅很快填好《黑鏡》的歌詞,但他仍要花很長時間消化內容,前後用近6個月時間才錄好這首歌。Michael又提到,雖然Ellen作品的風格偏向沉重和黑暗,但編曲及歌詞令歌曲帶離黑暗,有步向曙光的感覺。Michael坦言當時根本不明白這首歌想表達的信息,直到近期才有新的體會:「你肯面對心中嗰個黑鏡嘅時候,去到最尾,其實個人就可以放鬆。你面對到最黑,你先可以珍惜而家有光。」

+3
+2

正當打算將《黑鏡》派台時,Michael卻收到Ellen離世的消息,他不懂如何面對,所以決定擱置派台的計劃。說起《黑鏡》,他感覺每次靜下來都會想起Ellen寄Demo給自己。相比起推出EP,Michael更著緊前日(25日)推出的《黑鏡》,他直言:「兜兜轉轉呢兩年變到咁嘅樣係好神奇,到噚晚(前晚)我出呢首歌仲興奮過我出隻碟囉!」推出前一晚我仲喺度走嚟走去,依家終於可以釋懷啦。」單曲終於面世,Michael決定做一件兩年以來都很想做的事:「我send返個訊息畀Ellen,就話『我哋盡咗我哋嘅全心全意去做呢隻歌,希望佢鍾意。』」

談到與Ellen的相處,Michael懷緬的不只是音樂創作的點滴。時間回到2009年,Michael參加歌唱比賽,那時候他對結他、寫歌一竅不通,而Ellen是評審之一因此有一面之緣。8年後Michael邀請Ellen擔任演唱會嘉賓,自己技術亦有所進步,Ellen亦有讚許自己彈結他時右手的指彈技巧,說著說著,他面露微笑說:「係,人係需要認同嘅!」

錄完《黑鏡》後,Michael要認真面對17年來積累的人生問題。自小經歷父母離異,讓他心中的信念體系(Believe system)受到衝擊,而當時情緒亦接近崩潰,令他毅然出走到秘魯亞馬遜森林。雖然事出突然,但當時公司亦願意放行,好讓他有機會調整心態再出發。重返「人在野」的生活,讓他得到更多時間思考和面對問題:「夜晚半夜掛住屋企,唔知點解發惡夢,跟住先發現自己喺個森林度,夜晚就攬住棵樹喊。一個人都無,咁我可以同邊個傾計啫?唯有同棵樹囉。」

出走十多日後,Michael決定直接與家人傾訴,解開多年心結,亦讓他找回創作初心,重啟新碟製作工程。Michael開始打破過往計劃,透過《拾荒者之歌》記錄這段經歷,新碟收錄的《Ride Alone》、《阿茲與海默》和《I Don't Know》都是計劃以外的製成品。貪玩的Michael坦言自己變得更享受世界上的不如意:「如果所有嘢都好如意就好悶㗎啦。」

Ellen離世當日,恰巧Michael決定離開森林。除了收到Ellen噩耗,Michael還收到一個來自Ellen的信息,但這個訊息卻耐人尋味:「嗰個message係睇唔到嘅,喺個WhatsApp度卡住咗,寫住『cannot be seen』,因為我又無訊號,佢又無訊號,所以就卡住咗。」令他回想起製作《黑鏡》時,樂器的調音其是以A=432Hz作基準:「432Hz其實係一個接通第二啲軌道嘅頻率,但係一開頭我哋已經做咗,好似一開頭所有嘢都舖排晒。」

*自1955年起,現時音樂的調音以A=440Hz作基準。

《阿茲與海默》談及記憶及城市變化,以往Michael常在時代廣場Busking,不過最近法庭頒下永久禁止令,讓時代廣場的街頭表演成為絕響。面對規管越來越多,他卻認為改變的並非地域限制,而是Busking本質:「依家busking係複雜咗,又有咪啦,又有牌啦,又有個直播啦,都唔純粹嘅?嗰時busking係,我要唱歌之嘛,名都無㗎,嗰時都唔會整個牌喺度嘅。」

究竟當初Busking的純粹是怎樣?Michael則想起日前即興加入一對男女的點滴:「冇觀眾㗎,佢哋望住個海就咁唱歌,一個彈琴咁去唱,咁我就去join佢哋去唱歌啦,我諗busking就係咁樣嘅嘢。」儘管面對社會不同變遷,但Michael最不願意改變的,就是音樂在心中的意義及當初開始創作的快樂。



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。