【來稿】上水人夜歸手記 兩點開始等車,返到屋企嗰陣係日出

撰文:
最後更新日期:

一班人聚會,預咗大家玩得夜,所以基本上大家都會揀旺角、尖沙咀或者銅鑼灣呢啲交通方便嘅地方。而因為大家都好關顧我,知道我都就嚟住到返大陸,多數都唔會咁殘忍要我過海,而係好sweet咁約喺旺角。但即使係咁,每次同朋友分別之後、到返到屋企之前,嗰段時間一般都足夠我反思自己成個人生。

最近有區議員爭取北區增加通宵巴士,有啲人就覺得無呢個需要,因為北區都有通宵小巴啦。所以跟住落嚟我就介紹下,一個上水人深宵由旺角返屋企,可以有咩選擇,同埋呢啲算唔算係選擇。

撰文:邊境人

比較「豪」一點的夜歸人,早已知道在特定位置排隊等候,突然便會有一輛泥鯭的駛過來載人上車。(資料圖片 / 黃煒堯攝)

選擇一:的士

其實呢個對我嚟講就唔係選擇嚟嘅,因為由旺角搭的士返上水,起碼都要接近300蚊。本人就是一名窮L,次次玩得夜就搭的士,sorry,我真係唔捨得。

可能有人會話,旺角有泥鯭的嘛。係,不過泥鯭的其實係唔合法嘅(而且大學生時期,真心,連搭泥鯭都有少少肉痛)。如果有足夠嘅通宵車,泥鯭的點會做到風生水起、幾分鐘就上滿一架開得車?

深夜在旺角登上的士的話,大概40分鐘便能回到上水,但車費大約需近300元。(資料圖片 / 蔡正邦攝)

選擇二:小巴

啱呀,旺角係有小巴返上水呀,不過無論係上唔上到架小巴,你都註定要經歷一連串嘅掙扎同考驗。

首先,搭紅Van嘅話,條龍係會短少少嘅,不過上咗車之後呢,佢係會兜中大、大埔公路沿路嘅所有屋苑、大埔市區、粉嶺、聯和墟……當小巴喺上水警署對出個迴旋處兜第二個圈時,恭喜你,你終於開始入上水喇!

不果如果你搭綠Van嘅話,相信好多北區人喺排隊期間,都有經歷過究竟放唔放棄嘅內心掙扎,而呢個掙扎可能係會維持一個鐘以上(因為你仲未上到車),到你上到車嗰陣,你嘅內心可能充滿悔恨同憤怒,但最大嘅都係無力感,因為你已經攰到虛脫。

話說大學時期,成日都會因為搞活動、開會、同朋友聚會等等,搞到兩、三點先返屋企。到大家去到旺角解散嘅時候,我嘅噩夢就開始。我一般都會去搭唔使兜埋大埔嘅58S通宵綠Van,但多數你未去到小巴站附近,已經見到龍尾。

旺角通宵紅Van拯救了不少想省錢的夜歸人。(資料圖片 / 王譯揚攝)

無盡的等待與內心掙扎

如果係星期五、六、日凌晨一點左右呢啲高峰時段,通常人龍係最長嘅。條隊轉兩個彎、排到去快富街都試過,咁大約等十部八部就會上到車,但問題係啲班次係無固定嘅,一切由站頭個阿叔主宰。有時佢會行埋嚟安撫我哋話好快有車(但可能大家價值觀唔同啦,好快都至少要20分鐘左右先有一班)。上咗16個人,我終於轉咗彎見到OK便利店。

見到隔離線去大埔嗰班通宵小巴,條龍郁得好快,遲過我嚟嘅大埔友都上晒車,有時仲要係小巴等客,但北區呢邊仲係一架車都未返,會開始有啲心理不平衡。

等咗接近一個鐘,一般都去到168大廈出面㗎喇(但仲未轉彎望到旺角道嘅站頭),我開始收到朋友喺whatsapp group講低大家已經返到屋企、互報平安嘅訊息。

通宵小巴站前長長的人龍,是旺角深夜的獨特風景之一。(資料圖片 / 黃寶瑩攝)

放棄與不放棄之間

最後一段路先係最難捱嘅,有時明明已經見到曙光(個站頭牌),但成半粒鐘都未有一架車返嚟,感覺自己嘅命運只能夠被人支配。試過有個女仔頂唔順,離隊嬲住咁逐個問我哋夾唔夾的士,但一眾嘅窮人(包括我)考慮到返一程屋企要畀多一百幾十蚊,加上心存一絲僥倖,覺得等咗咁耐應該就嚟有車啩,我拒絕咗佢。最後佢憤而一個人跳上咗架的士,而我哋嘅等待依然沒有盡頭。

以上呢啲內心戲,我由大學時代到出嚟做嘢頭一兩年,上演過無數次。喺漫長嘅等待中,由焦急到怨恨點解仲未有車,有時甚至開始自我懷疑:咁大個人都仲要搭小巴係咪好廢?其實我係咪要轉下份工?

有時人龍無咁誇張,但其實可能係一個陷阱嚟。試過兩點同朋友喺旺角聚會完,見到條小巴龍好短,預計第二班車就上到。滿心歡喜跟隊,點知第一班車等咗45分鐘。

第二班車嚟到,我終於上到車,但已經係再一個鐘後嘅事。即係等咗差唔多兩個鐘!結果返到屋企光速沖好涼、撻落張床嗰陣,我聽到清晨嘅鳥鳴聲,望一望個鐘,已經接近5點。

油尖旺區以外,觀塘區亦有往北區的通宵小巴,不過要在沙田、大埔、粉嶺區內停留多時,才回到上水。(資料圖片 / 賴南秋攝)

最後選擇:巴士

其實真心,以上情況近年已經改善咗好多。因為由2013年中開始,九巴開咗條270S線,由尖沙咀返北區,初時尾班車係凌晨2點,後來開多一班2點半。就係咁,我唔再需要屈服喺鍾意就畀車你、唔鍾意就一個鐘都唔嚟一班車嘅小巴之下。

不過有時OT完好餓,同同事食個宵夜吹兩句水,就唔小心過咗鐘,搭唔到尾班車。所以如果北區人可以有架真正嘅通宵巴士,會係幾感動嘅事?



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。