【來稿】中大人點解會有「拖鞋病」？ 浸「村味濃」係點嚟？
有人話，港大嘅校服係A&F同Hollister，喺HKU Secrets仲有人問，港大幾時收購𠵱兩間出校服。同港大有強烈對比嘅，非中大莫屬。之前CUHK Secrets出咗個post：「掙脫鞋帶社會枷鎖，解放腳指展露自我」，列出「拖鞋病」嘅四個階段同病徵，分別係潛服期－宿舍著拖鞋、早期：著拖鞋上堂；中期：著拖鞋出沙田；末期：周末著住拖鞋返去屋企，有人留言補上第五期：「上環返工都係著拖鞋，我試過，我真係試過」。我喺中大讀咗三年半undergrad、兩年part time master，可謂病入膏肓！我曾經努力掙脫中大味，化妝、著高跟鞋返學，之但係，悉心打扮嘅人，幾乎係中大嘅少數族裔。
撰文：五年半山城人
畢咗業都洗唔甩嘅村味
有日，有同事同我講，佢去中大做嘢，見到中大人真係「村味濃」。佢話，最頂唔順嘅係中大人著「頹SOC」Tee（編按：即迎新營用的T-shirt），加對人字拖。仲話，人著短褲，我哋著短褲，人哋睇上去係熱褲，我哋睇上去似睡褲。
於是，我開始諗，點解以前返學真係可以咁頹？嗰陣頹氣，真係畢咗業都洗唔甩。
其實，開學初期，就算要返八半堂，我都會晨咁早起身化個妝，襯件靚衫。大學生活喎，嚮往咗咁多年，一定要好好享受，有個好形象。點知一返學就夢想破滅，個個同學（尤其住宿嘅同學）都係瞓醒咁款，洗完頭冇吹頭，冇洗頭冇梳頭；女嘅冇化妝，男嘅冇gel；好多人著住嘅拖鞋，唔係有造型嘅拖鞋，而係喺屋企或去游水著嘅「頹拖」，有啲好少少，就著有一輪好興嘅「鬆高拖鞋」。著住拖鞋，上堂時仲可以除鞋翹腳，或者干脆盤膝而坐，或者用腳趾甲抓痕，超爽皮！
98年情人節車禍致癱 女設計師放棄尋死 高呼：坐輪椅都可以扮靚
扮靚＝出街街？
你試諗吓，當你化哂妝，著條靚靚裙上堂，但身邊嘅同學都係落樓下咁款（其實因為好多人都上莊，日日通頂搞莊務，好難唔頹），你就係異類。我試過著短裙、高跟鞋返學，有不下五個人問：「嘩！你今晚去邊？」、「你約咗人呀？」、「又去老蘭？」我想篤篤手指咁答，其實我嗰日冇約人，甚至嗰日只係去樓下補習，因為返學見同學，想扮靚啲啫，但我真係開唔到口。
久而久之，我都唔敢太打扮，仲「德成女傭，融入家中」，好快融入中大嘅大家庭，著件緊身T-shirt（我堅持唔著頹Tee！），襯條似返條熱褲嘅熱褲，配對鬆高拖鞋，喺中大行走，真係賓至如歸，有家的感覺。我仲試過踢到文化中心睇歌劇，但俾個搣飛員趕返出嚟。
畢業之後，去沙田新城市行街，見到險被行李喼輾過嘅拖鞋人，一睇就知係師弟妹，好有親切感。
山城人自成一角
我都試過脫毒。Year2 嗰年去咗日本exchange半年，喺日本生活，化少日妝都好似冇禮貌咁。有啲好熟嘅日本朋友，明明已經成日一齊玩，一齊去旅行，但去旅行期間，有一兩日宅喺民宿唔出街，佢都會化妝，佢話𠵱個係對人同自己嘅尊重，搞到我即刻無地自容(~_~;)嗰陣剪咗個齊蔭，畀多少少心機化妝，振作咗半年，但返到香港一個月又打回原型。
呀，中大人仲有一個堂堂正正嘅理由著得頹。唔同港大、理大、浸大、城大咁位於市中心，見嘅都係市區人，返工嘅返工，出街嘅出街。但中大校園依山而建，周圍都係花木扶疏，同鳥獸蟲魚同處一山，好少外來人，係自成一角嘅小社區。住宿舍嘅人返學，就好似喺屋企開房門，出廳兜一轉咁自在。至於好似我冇住宿嘅朋友仔，搭程車就到山城，對住椰林樹影，鳥語花香，依然好適合解放腳指展露自我。
山城有個赤腳勇士，赤到出油尖旺？
但查實，對青春奔放嘅靈魂嚟講，著拖鞋都可以已經係好深重嘅枷鎖。中大心臟位置嘅某大屬會會室，曾經聚集全香港最講求批判解放嘅進步分子，中大人口耳相傳甚久，未入其房，先聞其味。進步分子嘅進步之處完全體現響佢哋嘅生活作息，晚七朝七趕稿議事打機，會室瞓會室食會室痾，有機垃圾同唐君毅全集相依共生。唔好話佢哋靡爛，𠵱啲叫做對「衛生」、「體面」、「愛自己」等等主流資本主義價值嘅激進抗爭，而𠵱啲生活習俗仲會代代相傳，在莊友間幾乎從未失傳過。而𠵱班進步分子之首，要數N年前嘅會長，哲學系出身嘅赤腳勇士。
佢係一頭魁梧嘅熊人，入學冇耐，就開始唔洗頭、沖涼、梳頭、換衫，同埋唔著鞋，唯獨係，頭上永遠要戴住粉紫色嘅頭箍。佢赤腳走遍中大大江南北之餘，去到你唔會想像到嘅天涯海角，最常去係油尖旺麻雀館。佢係黑格爾後人，華文世界新世代最有潛力嘅思想家，既係哲學系內儒人哲人教授嘅愛徒，乞衣style滔滔雄辯起來charm盡眾生，同莊友議論生命意義政治變局亦無不大殺四方。相信大地塵土深深孕育咗佢，是故，佢繼續唔洗頭、唔沖涼、唔梳頭、唔換衫，唔著鞋，粉紫色頭箍，由碩士讀到博士，做老鬼做到長駐會室，十幾年，始終如一。但道行再高也終有朝山上喪，年前某day佢深受無藥可醫嘅腳患之苦後就從此要著上一對鞋，無鞋嘅雀仔從此消失。（小消息：嗰對鞋咁多年又係冇換過）